Oroso atendeu máis de 200 peticións de axuda en só seis meses
Puxo en marcha en xuño un servizo de atención directa para os veciños do rural
Oroso. O Concello de Oroso puxo en marcha a finais do mes de xuño unha iniciativa para os veciños das parroquias, neste caso un servizo de atención directa dirixido a solucionar calquera tipo de problema ou incidencia que afecte á súa vida diaria.
Nos primeiros seis meses do servizo, o Concello atendeu máis de 200 peticións de axuda, normalmente por problemas en puntos de luz, colectores de lixo, acumulacións de auga polas chuvias ou baches nos camiños das parroquias. “Salvo algunha petición que require máis tempo ou excede das competencias municipais, damos unha solución rápida ás demandas dos veciños; o obxectivo desta liña directa é axilizar os procedementos neste tipo de incidencias”, explica Luis Rey, alcalde de Oroso.
O único que teñen que facer os veciños do rural de Oroso cando teñen algún problema é chamar ou enviar un whatsapp ao número de teléfono 654 343 809 (ou escribir un mail a info@oroso.gal) e son atendidos de forma inmediata. O concelleiro José Calvo encárgase deste servizo.
“Vivimos nun concello cunha contorna natural que temos que coidar entre todos, a renovación continua dos servizos e infraestruturas nas parroquias é unha prioridade para o noso grupo de goberno”, engade Luis Rey.
“Non hai mellor maneira de enterarnos dalgunha carencia ou incidencia que decirlle ao propio veciño que nos chame, que garde o número desta liña que poñemos á súa disposición e o utilice”, remata o alcalde. m.a.