En marcha o plan para rehabilitar o Centro de Interpretación de Buño
Actuarán no exterior e no interior do edificio, e a financiación correrá a cargo da Deputación
Malpica. A Deputación da Coruña investirá 44.297 euros na rehabilitación integral do Centro de Interpretación do Buño Oleiro e Terras de Bergantiños, ubicado no núcleo de A Camposa.
As obras están en fase de licitación ata o 28 de maio e terán como obxecto solventar as deficiencias detectadas no inmoble, cunha superficie construída de 1.000 metros cadrados, debido a varios anos sen actividade.
Os traballos inclúen a rehabilitación da cuberta e a substitución dos elementos máis deteriorados, como canalóns e baixantes, ou as tellas do módulo dereito do edificio, o saneamento da estrutura metálica e a limpeza dos vidros da marquesina de acceso do edificio.
Limparán con chorro de area a fachada e os pavimentos de pedra exteriores, eliminando posteriormente as gretas ou fisuras con cemento especial e aplicando un tratamento impermeabilizante elástico en dúas capas.
No interior restaurarán a carpintería metálica e de madeira, substituíndo os elementos deteriorados; reporán a tarima flotante e desmontarán os vidros para substituílos por un novo acristalamento laminar de seguridade.