Retómase a segunda fase do comedor do centro escolar da Maía
Farase a cimentación do edificio para así colocar a estrutura e avanzar nos traballos
Ames. Acaban de retomarse os traballos de construción do novo comedor do CEIP A Maía (Ames). Este proxecto foi adxudicado á empresa Eulogio Viñal Obras y Construcciones S.A. por un importe de 389.575 euros, e está sufragado con fondos propios do Concello.
Na actualidade, vaise comezar coa segunda fase dos traballos, que consistirá en realizar a cimentación do edificio para despois colocar a estrutura e avanzar na execución da citada obra.
Previamente, realizouse a primeira fase, que consistiu na demolición e desmontaxe dos módulos do antigo comedor. Coa construción desta nova infraestrutura preténdese ampliar o número de prazas do servizo municipal de comedor escolar, “xa que é unha demanda da comunidade educativa de Ames”, aseguran dende o goberno.
Actualmente, “o número máximo de prazas de comedor de dito centro é de 330 usuarios, mentres que o número de solicitudes incrementouse de maneira considerable, cunha previsión de 375 a 400 prazas previstas para o presente curso escolar”, explican fontes municipais. Ademais, isto suporá a creación de 150 novas prazas para o presente curso, das que 130 corresponden ao comedor do CEIP A Maía. A. P.