Só tres dos 25 concelleiros da corporación non teñen en propiedade ningún ben inmoble

O pasado 24 de xuño celebrouse no Concello o Pleno de organización, no que se decidiu entre outras cousas, a periodicidade das sesións plenarias, a composición das distintas comisións e o réxime de dedicacións exclusivas e parciais. Na devandita sesión tamén se estableceu o salario dos concelleiros con dedicacións exclusivas, 56.688.62 euros, o equivalente ao subgrupo A1 nivel 26 dos funcionarios municipais.

Polo momento aínda non están publicados no apartado de transparencia da web municipal os salarios reais, bruto e máis trienios, pero si as declaracións de “posible incompatibilidade e bens patrimoniais dos 25 edís que compoñen a Corporación municipal. Destacan o de Borja Verea (PP, Partido Popular), con dúas vivendas, unha en Santiago e a outra en Porto do Son, valoradas en 239.213,37 e 15.779,10 euros, respectivamente; e o nacionalista Xesús Domínguez, non tanto polo valor das propiedades senón polo número delas: un local comercial do que posúe o 100%, unha vivenda en Compostela e outra edificación no Grove, con participación do 50 e do 33,33%, respectivamente, así como 3 solares e 2 fincas herdadas, con participación sempre do 33,33%.

No polo oposto, en valor e cantidade de inmobles atópanse os concelleiros do BNG (Bloque Nacionalista Galego), Iago Lestegás e Pilar Lueiro, con propiedades por valor de pouco máis de 45.000 euros, no primeiro caso, e xustos no segundo. E tan só tres edís de toda a corporación non son titulares de ningunha propiedade inmble, é o caso de Xan Duro, concelleiro por CA (Compostela Aberta) e Adrián Villa e Nerea Barcia do PP.

A residencia da alcaldesa, Goretti Sanmartín (BNG), da que é titular ao 50% está valorada en 97.611,15 euros; mentres a primeira tenenta de alcaldesa, María Rozas (CA), é propietaria ao 100% de dúas vivendas, unha en Santiago e outra en Esteiro (Muros), por valor de 70.061,83 e 46.303 cada unha delas.

Doce dedicaciones exclusivas, tres parciales y 23 asesores en la nueva corporación de Raxoi

A segunda tenenta de alcaldesa, Miriam Louzao (BNG) ten en propiedade dúas vivendas ao 50%, cun valor aproximado de 98.000 euros; por detrás dela, Manuel César, do mesmo grupo, con dúas vivendas tamén, en Santiago e Vilagarcía de Arousa, cuns valores de arredor de 68.000 e 9.000 euros.

Finalmente, Mercedes Rosón (PSdeG, Partido Socialista), con propiedades en Compostela, Celeiro (Viveiro) e as Nogais, por valor de arredor de 97.000 euros a súa residencia santiaguesa, cun 25% de propiedade en Celeiro e co 100% dunha vivenda e dous soutos nas Nogais.

Os maiores propietarios da oposición municipal

Máis alá do líder do PP, Borja Verea, os maiores propietarios entre os edís da oposición son os tamén populares, Borja Rubio e Evaristo Ben, e os socialistas e exconcelleiros Sindo Guinarte e Gonzalo Muíños.

Un piso en Santiago, unha casa no concello de Teo e outro piso na Coruña son as propiedades de Sindo Guinarte, das que participa ao 50% no caso dos pisos, tendo o de Santiago un valor de 129.000 euros, e ao 100% na vivenda de Teo, cun valor de 113.000 euros. O seguinte en valor da propiedade é o popular Borja Rubio, cunha vivenda valorada en arredor de 204.000 euros, propiedade da que ten unha porcentaxe do 50%.

Tamén con dúas propiedades, sitúase o seguinte no escalafón, o popular Evaristo Ben, cunha vivenda de valor catastral 114.000 euros participada ao 50%, e outra vivenda de 92.000 participada ao 100%. E por último, entre os concelleiros con propiedades de maior valor está o socialista Gonzalo Muíños, cunha vivenda da que é propietario ao 50% e que ten un valor de 112.000 euros.

O valor catastral das propiedades dos demais concelleiros, con máis dunha propiedade participadas ao 50 ou ao 100% oscila entre os 70.000 e os 100.000 euros. Finalmente, aqueles edís con tan só unha propiedade móvense entre os 50.000 e os 70.000 euros.