Nace ‘Es ti que cantas’, unha iniciativa que achega a figura de Rosalía
O proxecto preséntase hoxe ás 12.00 no Instituto da Lingua Galega // Ten como base os audiolibros
Santiago. Es ti que cantas, un proxecto asentado nos audiolibros da obra en galego de Rosalía de Castro que integra tamén pílulas audiovisuais, unidades didácticas e un concurso, preséntaxe hoxe ás 12.00 horas no Instituto da Lingua Galega.
Esta iniciativa constitúe unha ferramenta para multiplicar a voz da autora dende a accesibilidade e a implicación directa co seus lectores e con todos os ouvintes.
A este respecto, o audiolibro xira arredor da figura de Rosalía de Castro dun xeito transversal e actual -en forma e estética-. O proxecto proporciona diferentes formas de que o público se achegue á obra de Rosalía de Castro: audiolibros, pílulas audiovisuais, unha unidade didáctica e un concurso. Todas orientadas a que a voz individual e de cada quen atope o seu propio camiño de descubrimento. “Cando Rosalía escribe, todas e todos soamos na súa voz”.
Esta iniciativa está artellada en varias partes. Por unha banda, están os audiolibros que abordan a obra en galego de Rosalía de Castro, así como o traballo Fiestras, unha serie de pílulas audiovisuais -a cargo do cineasta Xacio Baño- que afondan na relación da vida e da obra da autora.
Por outra banda, o concurso, que se inclúe dentro da programación do proxecto, está enfocado á mocidade de entre 12 e 18 anos, e se desenvolverá en Instagram e Tik Tok para que interpreten a obra en galego de Rosalía de Castro segundo o seu ollar.
O proxecto busca así ser unha ponte entre a autora e o seu público. ECG