Familiares, amizades e personalidades despiden a García-Bodaño en Bonaval
Os seus restos recibirán sepultura este venres en Boisaca // O presidente da Xunta e o conselleiro de Cultura, o alcalde de Santiago, o presidente da RAG e membros da institución pasaron pola capela ardente
![Capela ardente de Salvador García-Bodaño](https://estaticos-cdn.prensaiberica.es/clip/46a16731-3eab-446b-9ec7-fac9f0157795_16-9-discover-aspect-ratio_default_0.jpg)
Capilla ardiente de Salvador García-Bodaño / Jesús Prieto
Valeria Pereiras
“O compromiso coa lingua é unha constante na súa traxectoria e, ademais de bo poeta, García-Bodaño era un home dun trato encantador, moi próximo. Eu, particularmente, quedo contenta de que a Academia, que fai todos os anos unha homenaxe polo Día da Poesía, a Salvador lla fixera en vida”, expresou a EL CORREO GALLEGO a escritora Marilar Aleixandre, unha das primeiras en chegar, xunto coa familia, ata a capela ardente de Salvador García-Bodaño.
Instalado no auditorio do Museo do Pobo Galego, do que foi cofundador, co estandarte de Santiago e cuberto coa bandeira de Galicia, diante do seu féretro congregáronse multitude de personalidades do mundo da cultura e da política de toda Galicia. “Estamos despedindo unha figura enorme por todo o que representa, tanto para a cultura do noso país como polo grandísimo valor cívico que tivo sempre, o seu compromiso coa lingua e con todo o que tiña que ver con Galicia, en xeral, e Compostela en particular”, resumía Mercedes Rosón para quen “desde a perspectiva de Santiago hai poucos poetas que falaran tanto e tan ben de Compostela, que a describiran con tanto atino. Os seus poemas de amor parécenme sublimes, sempre recurro a eles cando oficio vodas no Concello”.
![A viúva de García-Bodaño e de fronte Alfonso Rueda / jesús prieto](https://estaticos-cdn.prensaiberica.es/clip/11564232-7b2c-4d42-a48c-b6e3798e639f_alta-libre-aspect-ratio_default_0.jpg)
A viúva de García-Bodaño e de fronte Alfonso Rueda / jesús prieto / VALERIA PEREIRAS
A concelleira de Acción Cultural e o alcalde de Santiago, entre outros membros da corporación, sen distinción de siglas nin partidos, quixeron despedir a quen foi fillo adoptivo da cidade e presidente de honra do Ateneo santiagués. Sánchez Bugallo chegaba sobre a unha e media da tarde acompañado do presidente da Xunta, Alfonso Rueda, o conselleiro de Cultura, Román Rodríguez, o secretario xeral de Política Lingüística, Valentín García, ou o director xeral de Cultura, Anxo M. Lorenzo. Tamén do presidente da Real Academia Galega que se referiu a García-Bodaño como o “Poeta de Compostela”. “Era un compañeiro xeneroso, moi querido por todos e todas nós, que participaba activamente nas actividades da RAG e que imos botar moito en falla”, expresou Víctor Freixanes. “Dende a independencia de criterio, de opinión, sempre foi leal ao seu país, que sentía profundamente, e leal aos seus amigos e ás institucións que nos representan”.
Ao longo do día, foron multitude as persoas que quixeron achegarse ata Bonaval, onde tiveron lugar as honras de despedida. Ademais de familiares e cargos institucionais pola capela ardente pasaron numerosos representantes da sociedade civil e persoas a título individual. Tralo peche da capela ardente, ás sete da tarde, o seu cadaleito foi trasladado á contigua Igrexa de San Domingos de Bonaval. Alí celebrouse unha cerimonia cívico-relixiosa, conducida polo sacerdote, filósofo, teólogo e escritor Andrés Torres Queiruga. No acto Branca Novoneyra encargouse de dar lectura a algúns dos poemas escritos por García-Bodaño.
Os seus restos mortais foron incinerados na tarde noite de onte, e o venres recibirá sepultura en Boisaca a carón doutros ilustres da nosa cultura como Valle-Inclán, Isaac Díaz Pardo, Antón Fraguas, Aurelio Aguirre e Carvalho Calero.
- El Correo Gallego - Diario de la capital de Galicia
- La lluvia reaparece en el verano de Galicia: este es el pronóstico de MeteoGalicia para el fin de semana
- La misa y ofrenda floral en honor a Rosalía de Castro congregan a más una treintena de instituciones gallegas
- Dos menores heridas en Muros al saltar desde un puente cuando pasaba un barco por debajo
- Impresionante chalet de ensueño en Santiago de Compostela: a 10 minutos del centro y 30 de la playa, todo un lujo a buen precio
- Esta es la aldea gallega que se encuentra al borde de los acantilados más altos de Europa: en la provincia de A Coruña
- La ola de calor se atenúa en Galicia: el alivio será temporal porque así se prevé el tiempo
- Os premios Alba de Compostela conseguen unir a todos os membros da Corporación local