Profunda renovación dos MacBook Air, Mac mini e iPad Pro

Durante a xornada de hoxe Apple celebrou un evento especial dende a Howard Gilman Opera House da Academia de Música de Brooklyn que serviu principalmente para dar conta do hardware da compañía da mazá que estaba pendente de renovar. Deste xeito déronse a coñecer os novos MacBook Air, portátiles que por fin contan con pantalla Retina, que xunto con novos procesadores, teclado e trackpad de nova xeración, tecnoloxía Touch ID e portos Thunderbolt 3 (USB-C) supoñen unha posta ao día moi significativa, que permite manter viva esta liña de equipos portátiles que gozaba de moi boa sona.
Outros equipos que precisaban dunha renovación dende hai moitos anos eran os Mac mini, que na súa versión renovada sorprenden pola súa elevada potencia e amplo abano de configuracións que fan que teñamos ordenadores compactos de entre 899 e 4.969 euros.
Os iPad Pro, pola súa banda, eran os produtos máis previsibles, xa que tenden a renovarse anualmente, e moitas filtracións apuntaban a que adoptarían a tecnoloxía Face ID para poder dicir adeus ao botón de inicio e así poder aproveitar mellor a súa parte frontal.
Precisamente os novos iPad viñan acompañados pola estrea de iOS 12.1, actualización do sistema operativo móbil de Apple que incorpora a esperada funcionalidade de FaceTime de grupo e máis de 70 novos emoji, aínda que os usuarios que máis agradecerán esta actualización serán os que teñen algúns dos novos iPhone, xa que agora poderán axustar a profundidade de campo da cámara tanto antes de disparar a instantánea como despois e tamén reciben o soporte de dobre SIM, ou sexa, que poderán ter no móbil tanto unha nano SIM como unha eSIM (ou SIM virtual).

MacBook Air

Hai dous anos e medio os MacBook Air recibiron unha actualización menor, de xeito que este equipo permanecía no catálogo de Apple como un produto claramente desfasado tecnoloxicamente, especialmente no que á súa pantalla se refire, pero finalmente a compañía da mazá quixo renovalo de verdade, e agora presenta unha pantalla Retina de 13,3 polgadas, Touch ID, procesadores recentes e un deseño aínda máis portátil, chegando con acabados en tres cores diferentes (ouro, gris espacial e prata).
O principal cambio dos novos MacBook Air é claramente a súa pantalla IPS, que por fin presenta unha resolución acorde aos tempos (2.560 x 1.600 píxeles fronte aos ridículos 1.440 x 900 píxeles do modelo anterior), de xeito que xa pode colocarse á altura do resto de MacBook; pero tamén actualiza o resto das súas tecnoloxías, como o seu teclado retroiluminado e o seu trackpad con Force Touch, unidades SSD de grande velocidade (un 60% máis rápidas que na anterior xeración), un par de portos Thunderbolt 3 (para unha maior conectividade), e incluso unha autonomía de até 12 horas de navegación web, á vez que contén o seu grosor nos 1,56 centímetros e o seu peso nos 1,25 quilos.
Estes novos equipos funcionan cun procesador Intel Core i5 de dobre núcleo, SSD de entre 128 GB e 1,5 TB, 8/16 GB de RAM, gráfica Intel UHD Graphics 617, Wi-Fi AC, Bluetooth 4.2, altofalantes estéreo de grande calidade, toma para auriculares e 3 micrófonos.
O modelo máis básico dos novos MacBook Air contaría con 8 GB de RAM e 128 GB de SSD a un prezo de 1.349 euros, mentres que o modelo con 256 GB de almacenamento subiría o seu prezo até os 1.599 euros. A versión máis completa, con 16 GB de RAM e 1,5 TB de SSD chegaría até os 3.089 euros, prezo bastante sorprendente para un portátil que non pertence á familia Pro.

Mac mini

Os usuarios de ordenadores de sobremesa de Apple que non gustaban dos iMac por mor de querer empregar unha pantalla diferente á integrada nos todo-en-un da compañía de Cupertino levaban 4 anos esperando pola renovación do Mac mini, equipo que por fin recibiu a actualización de rigor, que ao chegar tan tarde supón un incremento de potencia sen precedentes (funciona até 5 veces máis rápido que o modelo anterior).
Os novos Mac mini poden equiparse con procesadores de 4 ou 6 núcleos (dende un Intel Core i3 até un Intel Core i7), até 64 GB de RAM, almacenamento SSD de alta velocidade (entre 128 GB e 2 TB), 4 portos Thunderbolt 3 (compatibles con USB 3.1 e DisplayPort), saída HDMI 2.0, 2 portos USB 3, gráfica Intel UHD Grahics 630, Gigabit Ethernet (con opción de Ethernet a 10 Gbps), Wi-Fi AC, Bluetooth 5.0... ou sexa, unha capacidade que deixa claro que o tamaño non é o que mide a capacidade deste impresionante ordenador que consegue ocupar só 19,7 x 19,7 x 3,6 centímetros e pesar 1,3 quilos.
Dado que a potencia non é mini, tampouco o é o seu prezo, e os Mac mini cun procesador Intel Core i3 de 4 núcleos, 8 GB de RAM e 128 GB de SSD custan 899 euros, mentres que o modelo cun procesador Intel Core i5 de 6 núcleos, 8 GB de RAM e 256 GB de SSD chegaría até os 1.249 euros. A versión máis completa, cun procesador Intel Core i7 de 6 núcleos, 64 GB de RAM, 2 TB de SSD e 10 Gigabit Ethernet tería un prezo de 4.969 euros, deixando claro que en equipos como este as aparencias enganan.

iPad pro

Na presentación de hoxe Apple anunciou a renovación dos iPad Pro, no que podería considerase a actualización máis profunda realizada nunca nun iPad, xa que ao integrar Face ID e xestos (de xeito que non precisan de botón de inicio) conseguen que as súas pantallas Liquid Retina de 11 e 12,9 polgadas estean rodeadas por un marco simétrico bastante reducido, no que supón un grande aproveitamento do espazo.
Os novos iPad Pro tamén incorporan os novos procesadores A12X Bionic, que presumen de superar en potencia á meirande parte dos ordenadores portátiles do mercado, incorporan finalmente conector USB-C, a súa versión con conectividade móbil permite Gigabit LTE e incluso pode equiparse con até 1 TB de almacenamento, o que, xunto ao feito de que en breve vaia ter dispoñible unha versión do Photoshop CC que promete ser tan capaz como a de ordenadores persoais, que falamos dun iPad máis Pro que nunca.
Con estes equipos tamén chega a renovación do Apple Pencil, que pode ancorarse magneticamente ao iPad Pro e cargase sen fíos simultaneamente.
Cómpre salientar que o novo modelo con pantalla de 11 polgadas ten as mesmas dimensións externas que o modelo anterior de 10,5 polgadas, ou sexa, que aproveita mellor o seu espazo para acoller un maior número de píxeles; mentres que o modelo de 12,9 polgadas conserva as dimensións do panel, pero reduce o seu volume un 25% facéndoo moito máis transportable.
A eliminación do conector Lightning para apostar por un conector USB-C supón un impresionante incremento de posibilidades, xa que o novo porto permite cargar a tableta, transmitir datos a altas velocidades (USB 3.1) e incluso conectar televisores externos con resolucións de até 5K. Como curiosidade, o porto USB-C do iPad Pro podería servir incluso para cargar un iPhone.
Aparte do novo Apple Pencil, tamén está dispoñible para a súa compra por separado o Smart Keyboard Folio, unha funda-teclado que protexe completamente o iPad Pro durante os desprazamentos e que facilita o seu uso a xeito de ordenador portátil sobre o escritorio.
O iPad Pro de 11 polgadas con 64 GB de almacenamento e conectividade Wi-Fi ten un prezo de 879 euros, mentres que os modelos con 256 GB, 512 GB e 1 TB de capacidade custarían 1.049, 1.269 e 1.709 euros respectivamente. As versións con conectividade móbil custarían 1.049, 1.219, 1.439 e 1.879 euros en función da capacidade.
A versión con pantalla de 12,9 polgadas partiría dun prezo de 1.099 euros para a versión con 64 GB de almacenamento e Wi-Fi, mentres que os seus modelos con 256 GB, 512 GB e 1 TB de almacenamento custarían 1.269, 1.489 e 1.929 euros respectivamente. As versións con conectividade móbil custarían 1.269, 1.439, 1.659 e 2.099 euros en función da súa capacidade de almacenamento.