En marcha o e-Centro Galego de Barcelona

Ante a prolongación das medidas de confinamento derivadas da pandemia polo novo coronavirus, polas que o Centro Galego de Barcelona pechou o pasado mes de marzo, a entidade renovará as actividades nos próximos días de forma virtual grazas á posta en marcha do e-Centro Galego. O presidente do Centro, Carlos Mandianes, impulsou esta iniciativa pola que os socios poderán seguir online as clases das distintas disciplinas que se imparten no mesmo a través dunha plataforma de videoconferencia. Desta forma, conséguese que a suspensión total da actividade da entidade non se prolongue por máis tempo mantendo as directrices impostas pola pandemia.

Mediante esta tecnoloxía, os profesores de cada actividade impartirán as clases desde o seu domicilio e os socios interesados poderán acceder a elas conectándose por un sinxelo procedemento á plataforma. Por este método está previsto renovar as clases de coral, acordeón, pandeireta gaita, poesía e cultura galega.

O uso da tecnoloxía é unha das liñas innovadoras seguidas pola directiva que preside Mandianes, que foi xa pioneira no uso das mesmas para celebrar reunións mediante videoconferencia. Así mesmo, impulsou outras accións como a implantación de carnés dixitais para os socios, a creación dunha app do Centro para móbiles, etcétera. redacción