Especialistas abordarán mañá no CCG o patrimonio do ferrocarril
Participan no encontro historiadores e xestores de espazos museísticos sobre este transporte
Santiago. Este mércores cúmprense anos da inauguración do Viaduto de Gundián, en Vedra, co que se completou o último tramo da conexión de Galicia coa Meseta. Unha efeméride á que se xuntan dúas máis: estamos no Ano Europeo do Ferrocarril e cúmprense 140 anos da chegada do ferrocarril a Galicia.
O Consello da Cultura Galega (CCG) aproveita estas celebracións para organizar na súa sede a xornada O patrimonio industrial ferroviario no Ano Europeo do Ferrocarril, na que estarán presentes historiadores e xestores de espazos museísticos vencellados á memoria deste transporte.
A presidenta do Consello, Rosario Ávarez, inaugura esta cita que se pode seguir en directo desde o web do CCG.
En diferentes cidades e vilas de Galicia é doado atopar asociacións de “amigos” do Ferrocarril que se ocupan de manter a memoria do que supuxo a súa construción.
Con todo, segue pendente a abordaxe definitiva e homologada de espazos museísticos e centros de interpretación que cubran a importancia deste medio de transporte para Galicia. Sobre estes asuntos falarán especialistas como os profesores Xosé M. Núñez Seixas e Xosé Ramón Veiga Alonso, que ofrecerán a perspectiva histórica e os retos que quedan por acometer
Outros, como o ilustrador e escritor e Francisco Boluda máis a arqueóloga Nieves Amado, abordarán a perspectiva do asociacionismo e actividades culturais.
Tamén asistirán María Xosé Porteiro, Carlos Abellán e Luís Blanco, entre outros. ecg