‘Nós’, elixida Palabra do ano 2020 por votación popular
Conseguiu 3 de cada 10 votos emitidos. Entre as finalistas destacaron termos relacionados coa COVID como pandemia, máscara ou vacina.
‘Nós’ foi a palabra gañadora da votación popular para ‘Palabra do Ano 2020’ promovida polo Portal das Palabras, a páxina web para a divulgación do léxico galego da Real Academia Galega (RAG) e a Fundación Barrié.
‘Nós’, que conseguiu tres de cada dez votos emitidos, erixiuse como gañadora entre unha serie de finalistas ente as que destacaron palabras relacionadas coa covid-19 como ‘gromo’, na súa acepción de ‘aparición repentina dunha enfermidade epidémica entre a poboación dun determinado lugar’ --que a RAG incorporou ao seu dicionario en 2020--, ‘pandemia’, ‘máscara’ e ‘vacina’.
A Real Academia Galega barallou, nun comunicado, que a elección de ‘Nós’ como palabra deste 2020 pode deberse a un intento de “evasión colectiva nun ano en que a covid-19 disparou a utilización de novos termos”.
Ademais, indicou que con este vocábulo a poboación galega honra a celebración do centenario da xeración Nós e “mira cara ao futuro con optimismo, xa que a saída da crise global provocada polo coronavirus depende da primeira persona do plural”.
Con todo, a segunda palabra máis votada por detrás de ‘Nós’, foi ‘seteiro’, en referencia ao grupo de estrelas denominado tamén ‘arqueiro’ e que o Seminario de Terminoloxía da Real Academia Galega aprobou na súa lista normalizada de nomes galegos de constelacións.
SANTIAGO. EUROPA PRESS