Unha nova ponte na rúa Fomento reducirá o risco de asolagamentos na zona máis inundable de Carballo
A Xunta adxudicou as obras por máis de 1,8 millóns de euros
O proxecto inclúe a demolición dunha edificación e unha escaleira
![O plan inclúe un ‘by-pass’, xa executado, na zona do Muíño do Quinto, de Carballo](https://estaticos-cdn.prensaiberica.es/clip/dda35bbf-739b-4666-920d-b53abe6ce5d7_16-9-aspect-ratio_default_0.jpg)
O plan inclúe un ‘by-pass’, xa executado, na zona do Muíño do Quinto, de Carballo / concello de carballo
A Consellería de Infraestruturas e Mobilidade, a través de Augas de Galicia, adxudicou a S.A. de Obras y Servicios Copasa, por 1.847.114 euros, a execución da obra de remodelación da ponte da rúa Fomento de Carballo, para reducir o risco de inundación no río Anllóns. O proxecto inclúe a transformación da canle e motas de contención augas abaixo desta ponte, e ten un prazo de execución de 8 meses.
Os traballos adxudicados contemplan a ampliación e corrección do leito do río, a construción dunha nova ponte e de motas augas abaixo. Tamén se prevé a demolición dunha edificación e dunha escaleira situada augas arriba da ponte. Derrubarase a ponte que conecta a rúa Fomento e a avenida de Fisterra, co fin de ampliar a sección do leito, e tamén un edificio sito na rúa Fomento anexo ao leito. A nova ponte construirase sobre 8 vigas de formigón pretensado dobre de máis de 22 metros de lonxitude e máis de 4 de anchura, e terá 2 carrís e dúas beirarrúas. A estrutura permitirá o paso inferior dunha senda a ambas marxes inundables no caso de crecidas.
Elevar a cota de rebosamento
Na intervención deseñada por Augas de Galicia, proxéctase tamén a apertura do leito aumentando a sección dispoñible, nunha lonxitude de 121 metros na marxe dereita e 158 metros no esquerdo, e elevando a cota de rebosamento mediante un muro-bancada. O sostemento dos noiros realizarase mediante muros de dique executados reutilizando parte do material existente.
As obras inclúen a repavimentación da senda adxacente ao leito por ambas as marxes, e dotarase o acceso á senda desde a rúa Fomento e a avenida de Fisterra mediante ramplas a cada lado do leito. Este contrato forma parte das actuacións recollidas no convenio de colaboración entre a Xunta e o Concello de Carballo para a execución das obras identificadas como prioritarias no Plan de xestión específico da área de risco potencial significativo de inundación deste río, cun investimento total de 6,3 millóns. En concreto, intervirase na zona onde se produce un estreitamento do leito do río, unha das zonas más inundables.
- El Correo Gallego - Diario de la capital de Galicia
- La lluvia reaparece en el verano de Galicia: este es el pronóstico de MeteoGalicia para el fin de semana
- La misa y ofrenda floral en honor a Rosalía de Castro congregan a más una treintena de instituciones gallegas
- Dos menores heridas en Muros al saltar desde un puente cuando pasaba un barco por debajo
- Impresionante chalet de ensueño en Santiago de Compostela: a 10 minutos del centro y 30 de la playa, todo un lujo a buen precio
- Esta es la aldea gallega que se encuentra al borde de los acantilados más altos de Europa: en la provincia de A Coruña
- La ola de calor se atenúa en Galicia: el alivio será temporal porque así se prevé el tiempo
- Os premios Alba de Compostela conseguen unir a todos os membros da Corporación local