Mazaricos rememora as persoas que defenderon o monte veciñal
‘Che de Pedro’, de Eirón, faleceu en 1963 cando tentaba evitar a usurpación
Ao acto asistiron máis de medio cento de veciños e familiares
J. M. Ramos
Máis de medio cento de veciñas e veciños participaron no III Día de Loita da Veciñanza Comuneira na Defensa do Monte Veciñal en Eirón (Mazaricos). Renderon homenaxe a Xosé Esperante, ‘Che de Pedro’, veciño do municipio que faleceu nos enfrontamentos en defensa do monte veciñal durante o franquismo, e a todas as persoas que defenderon este modelo de propiedade fronte aos intentos de usurpación.
A xornada, organizada polo Instituto Galego das Terras Comunitarias (INGATECO), estivo presidida polo alcalde, Juan Blanco, quen recoñeceu o carácter emotivo desta conmemoración e a súa importancia para a posta en valor dun modo de vida como é o do rural.
O profesor de Economía Aplicada da USC e no seu día director xeral de Desenvolvemento Rural, Edelmiro López, impartiu a conferencia O futuro dos Montes Veciñais en Man Común na Galiza rural do século XXI. Reclamou que a visión deste modelo vaia alén do punto de vista sectorial forestal, considerando o monte veciñal como un recurso para o desenvolvemento socioeconómico das comunidades rurais, destinado a usos diversos e cun marco legal que impulse a produtividade mantendo a propiedade.
Tamén interviu Xosé Alfredo Pereira, presidente da Organización Galega de Comunidades de Montes, constituída hai 25 anos de existencia, antes de que os asistentes se trasldaran ata o monumento de Che de Pedro, situado nos montes de Eirón, onde se realizou unha ofrenda floral e interviñeron os seus familiares.
Xosé Esperante morreu en 1963 no marco dunha das loitas, frecuentes na Galicia da época, en defensa do monte veciñal. Dende a organización lembran que durante o franquismo establecéronse mudanzas lexislativas que supuxeron a repoboación de milleiros de hectáreas de monte galego sen ter en conta á veciñanza. Procesos nos que os concellos actuaban como intermediarios co Estado central, sen defender os intereses das e dos veciños.
“O resultado foi que se impediu a xestión local destas propiedades veciñais, alterando gravemente os ecosistemas e a súa relación co mundo agrícola. Na práctica, milleiros de labregos foron privados dos seus montes”, subliñan.
Che de Pedro foi unha das vítimas deste proceso. Durante a repoboación do monte do Outeiro, a veciñanza mobilizouse contra a expropiación dos seus terreos. As forzas de seguridade franquistas abriron fogo e feriron gravemente a Xosé Esperante e outros dous veciños. Che morrería pola falta de atención médica no monte. O episodio marcou un punto de influencia na loita comuneira, forzando á administración a reconsiderar a súa política.
- El Correo Gallego - Diario de la capital de Galicia
- Ocio nocturno en Compostela: un viaje nostálgico a la era dorada de los 80 y 90
- Así es el original mirador de Santiago que permite sacar la fotografía más buscada de la Catedral
- El creador de ‘El caso Asunta’ revela nuevos detalles de la ficción que narra el crimen más mediático de Santiago de Compostela
- Acciona se asocia con Nissan para la distribución en Europa de su nuevo nanocar Silence S04
- Así es el impresionante palacete que recuerda a Downton Abbey: a la venta en Santiago de Compostela
- Detenido un joven en un piso de Santiago tras intervenirle cinco kilos de hachís y un centenar de pastillas
- Las ventas de coches cierran el primer cuatrimestre en Galicia con un aumento de casi el 16%, el doble que en España