Travesías ao Parque Nacional das Illas Atlánticas dende A Pobra

A Concellaría do Turismo da Pobra do Caramiñal, no seu afán por potenciar os recursos do municipio e ofrecer, a veciños e turistas, alternativas de lecer durante o verán, promoverá seis visitas ao Parque Nacional das Illas Atlánticas.

Baixo o slogan A Pobra do Caramiñal, vive a experiencia..., o Concello deseñou unha programación baseada en accións diferenciadoras que aporten un valor engadido á estadía na localidade, e que sirvan para dar a coñecer o patrimonio natural, histórico e cultural, “para que a xente o experimente”, afirmou a concelleira de Turismo, Estefanía Ramos, quen presentou as propostas na compaña das técnicas municipais Ángeles Tubío e Sara Sánchez.

Barbanza lidera un programa pionero en Galicia de turismo inclusivo en torno al patrimonio marítimo

Entre as accións diferenciadoras, apostan por seguir achegando actividades con moita aceptación para coñecer outras paraxes naturais como é o Parque Nacional Marítimo-Terrestre das Illas Atlánticas. Para tal cometido, volverán colaborar coa empresa Piratas de Nabia, que fará realidade as travesías.

As Illas Cíes serán a primeira parada, o 30 de xuño, e tamén porán o broche de ouro a esta serie de saídas o 1 de setembro. O programa inclúe visitas a Sálvora o 21 de xullo e 3 de agosto. Nesta última data vivirase a experiencia Starlight para coñecer este anaco de terra na bocana da ría da Arousa durante a tarde-noite e observar as estrelas dun ceo sen contaminación lumínica. E o 28 de xullo e 11 de agosto porán rumbo a Ons.

Os hostaleiros da Pobra achegan os produtos do mar ao prato a través dun novo receitario

Tódalas travesías náuticas inclúen ruta guiada. As viaxes a Cíes e a xornada Starligth de Sálvora teñen un prezo de 34 euros por persoa adulta, mentres que a de Ons e a diúrna a Sálvora baixa ata os 30 euros. No que respecta a crianzas entre 4 e 12 anos, o importe a pagar sitúase nos 18 euros en tódalas viaxes.

As persoas interesadas deberán tramitar as reservas a través da páxina web www.piratasdenabia.com, ou chamando ao teléfono de contacto 986 320048. Tamén están a dispor os dous números do departamento de Turismo da Pobra do Caramiñal para resolución de dúbidas: 671 090262 e 687 482835.