Mirar o futuro con esperanza
![Mirar o futuro con esperanza Mirar o futuro con esperanza](http://www.elcorreogallego.es/binrepository/394x506/0c0/0d0/none/102922340/GXDL/por1_422-3706058_20210724203309.jpg)
![Mirar o futuro con esperanza Mirar o futuro con esperanza](http://www.elcorreogallego.es/binrepository/394x506/0c0/0d0/none/102922340/WUDL/por2_422-3706059_20210724203310.jpg)
![Mirar o futuro con esperanza Mirar o futuro con esperanza](http://www.elcorreogallego.es/binrepository/394x506/0c0/0d0/none/102922340/GWDL/por3_422-3706060_20210724203310.jpg)
![Celebración do DÍA DE GALICIA. As mulleres ocupan un lugar destacado nas portadas de EL CORREO GALLEGO dos últimos anos Celebración do DÍA DE GALICIA. As mulleres ocupan un lugar destacado nas portadas de EL CORREO GALLEGO dos últimos anos](http://www.elcorreogallego.es/binrepository/395x506/0c0/0d0/none/102922340/FRDK/por4_422-3706061_20210724203310.jpg)
Son 65 mulleres as protagonistas destas páxinas que bosquexan un país e que están escritas, un ano máis, en feminino e en plural. Ateigadas de ideas, enfoques e propostas diversas mesturadas con denuncias e reivindicacións, con historias e vivencias tan auténticas como elas mesmas. Queda claro que o mundo non é de ninguén e é de todos. E, desde logo, de todas. Como a propia causa da igualdade na que EL CORREO GALLEGO se empeña desde unha das súas vocacións.
Galicia celebra o seu Día grande sen desviarse do rexistro da prudencia, pero con optimismo e ilusión. Certo que a pandemia segue aí e que, despois de tanto tempo de sacrificios e limitacións, a nosa gran aspiración aínda é reconquistar a normalidade, pero tamén é verdade que as vacinas minimizaron a mortalidade e están dándolle a volta á situación sanitaria, e que case podemos tocar os fondos europeos que relanzarán a economía. Vacinas e fondos son ecos de iniciativas científicas que deberemos estimular moito máis e da resposta decidida e común, por fin, a unha necesidade compartida, e estannos acercando cada día á vida tal como era, á recuperación e ao progreso.
Celebra Galicia o Día da Patria e a política, as necesidades, as queixas e os desexos de futuro de galegos e galegas faranse moi presentes nas rúas, outra vez sen manifestacións multitudinarias, pero coa forza de sempre. Honra Galicia ao Apóstolo e o feito relixioso vólvese máis histórico e máis vital. Hoxe sentimos o apoio dun xeito especial logo de que o papa acuñara unha devezada ampliación do Ano Santo, que se prolongará ata 2022 e que será decisivo tamén no ámbito económico nestes momentos de afogo. Ademais, os Reis, Felipe e Letizia, presiden en Compostela a Ofrenda na Catedral, acompañados da princesa Leonor e a infanta Sofía. A súa presenza é un significado alento e amplifica a proxección da cidade, de toda comunidade e do Camiño en pleno Xacobeo.
Don Felipe asiste ao acto de entrega das Medallas de Galicia e tamén participa na reunión do Real Padroado da Cidade. O do Padroado é un reencontro moi desexado logo de moitos anos de silencio, e debería ser útil e produtivo para a capital de Galicia. A alcaldía avanza grandes expectativas mentres que os partidos da oposición mostran dúbidas, reticencias ou escepticismo e apremian unha mirada cómplice e sincera do Goberno central, ata agora esquiva, que se traduza en atención e recursos. En calquera caso, hai consenso en que é unha boa noticia, e o alcalde anunciou o arranque dun importante programa de investimentos a executar en Santiago na vindeira década.
Recoñezamos que, aínda habendo serias dificultades, hai motivos para mirar o futuro con confianza. EL CORREO, que cumpre xa 144 anos o 1 de agosto, súmase á celebración do 25-X con este suplemento e reafirmando o seu compromiso coa defensa de Galicia e coa información, para ofrecer nas edicións de papel e dixital un produto xornalístico digno. X.C.O.