Santiago é pioneira, entre as cidades patrimonio, na dotación de fibra óptica no casco histórico

O salón vermello do Pazo de Raxoi acolleu na mañá do mércores a 'celebración' polo remate do proceso de instalación de fibra óptica no casco histórico da cidade. A capital galega convértese así en pioneira, entre as cidades patrimonio, na dotación deste servizo dentro da améndoa. Un proceso xestionado polo Consorcio e Amtega (Axencia de modernización tecnolóxica de Galicia) que o subdirector xeral de Conservación de Bens Culturais da Xunta, Manuel Chaín, describiu como "salvagarda do patrimonio conectándoo co futuro".

El despliegue de fibra óptica ultrarrápida dispara la competitividad de los polígonos compostelanos

Este proxecto, dotado cun orzamento de 2,6 millóns de euros -2,4 millóns de euros por parte da operadora e de 238.000 euros por parte do Consorcio-, foi asumido pola teleoperadora Orange e botou a andar no outono de 2020. Desenvolveuse en 13 fases, instalando máis de 21 quilómetros de cabo no casco histórico e máis de 1.000 caixas 'Compostela' (dispositivo de menor tamaño que os habituais e bautizado así por ser creado ad hoc), que dota de conexión dixital a máis de 6.000 fogares da cidade.

No acto interviron, ademais da alcaldesa da cidade, Goretti Sanmartín, a xerente do Consorcio de Santiago, Belén Hernández, o subdirector xeral de Conservación de Bens Culturais da Xunta, Manuel Chaín, a directora de relacións institucionais de Orange, Nani Fernandez, e Miguel Rodríguez Quelle en representación de Amtega.

As características patrimoniais da zona vella fixeron imprescindibles unha serie de condicións para a instalación da fibra óptica co obxectivo de minimizar o impacto visual, polo que foi necesario o deseño especial das pequenas caixas, creadas pola empresa Commscope para a operadora Orange, que implementou e facilitou a adaptación das caixas á arquitectura patrimonial de Santiago.

Ademais, instalouse unha rede aberta —que debe ser compartida por todos os operadores— e realizáronse acometidas específicamente definidas para cada fachada. Ao finalizar a súa intervención, Nani Fernández, fixo entrega dunha destas caixas ‘Compostela’ á alcaldesa. O ámbito de actuación foron as consideradas como “zonas brancas” no Plan Especial da Cidade Histórica, é dicir, áreas sen servizo de fibra óptica por parte de algunha empresa operadora

A relatora do longo proceso "con final feliz" que foi a dotación de fibra óptica no casco histórico foi Belén Hernández, que explicou ao auditorio a complexidade do proxecto e as reticencias de diversos operadores de telecomunicacións ante as dificultades da instalación ao tratarse a améndoa dun ben patrimonial protexido e aducindo a "inviabilidade económica" da tarefa.

Unha vez que Orange se sumou ao proxecto, man a man con Lourdes Pérez, a arquitecta directora da oficina técnica do Consorcio, comezaron os traballos que tiveron que adaptarse á lexislación de conservación patrimonial e no que todos os relatores no evento coincidiron en destacar o papel colaborativo da veciñanza.

Colaboración público-privada

Todos os participantes no evento manifestaron a súa satisfacción pola boa colaboración público-privada entre as partes implicadas para executar con éxito a instalación da fibra óptica na cidade histórica. 

Unha colaboración que comezou en novembro do 2019 tras unha consulta pública e aberta na que participaron a Consellería de Cultura e Turismo, Amtega e o Concello de Santiago, unha colaboración que para Miguel Rodríguez Quelle resultou do traballo en equipo e “arreo” de expertos, a prol da chegada da fibra óptica ao casco vello e en todo momento respectando o seu marcado carácter patrimonial sen perder nunca de vista a meta de poñer este esencial servicio á disposición da veciñanza de Compostela.

Como resultado da convocatoria, tres foron as empresas operadoras que presentaron unha proposta técnica de proxecto piloto para a instalación. Iniciábase así un longo proceso de colaboración entre diferentes axentes públicos e privados, empresas contratadas e equipo técnico humano aos que a alcaldesa Goretti Sanmartín agradeceu o seu traballo.

A rexedora congratulouse do éxito deste proxecto, “de vital importancia para o asentamento de poboación e negocios na cidade histórica” e recordou que “non foi un proceso fácil” xa que foi necesario “atopar os equilibrios para dotar de servizos unha zona da cidade que debe estar viva e habitada”.