Os populares demandan transparencia sobre a contratación da nave de Desproi

O voceiro do goberno local, Sindo Guinarte, elevou o ton ante as críticas dunha oposición que “só busca facer sangue” e que “semella padecer algún tipo de amnesia temporal”.

Recordou Guinarte que a candidata á alcaldía por Compostela Aberta, María Rozas, propuxo o alugueiro dun local por 8 anos, sito no número 37 da rúa Corredoira das Fraguas “que lle custa ao Concello 853 euros mensuais”: “María Rozas comprometeu máis de oitenta mil euros no alugueiro dun local, por oito anos, sen concorrencia competitiva de ningún tipo” explicou. Serán, concretamente, 81.932 euros os que o Concello terá abonado ao remate dos 8 anos nos que a edil de CA fixou a duración do contrato.

Insistiu en que o equipo de goberno non ten nada que ocultar e “seguiremos sendo completamente transparentes como o fomos desde o primeiro momento” e en que “a única cuestión que se lle pode achacar á formalización deste contrato “foi o erro de Pichel” ao non informar “de que tivera unha vinculación accionarial coa empresa propietaria”.

Pola súa banda, Compostela Aberta tamén solicitou ao goberno local que actúe “coa transparencia que faltou ata o de agora” e faga público o informe da Secretaría Xeral do Pleno ao que aludiu José Manuel Pichel cando anunciou a súa dimisión, así coma os resultados da análise xurídica que, segundo se ven sinalando, estase a realizar do expediente da contratación do alugueiro do inmoble á empresa Desproi, vinculada ao xa exconcelleiro.

María Rozas reiterou que “quedan moitas explicacións por dar sobre este caso, e non só relacionadas coa actuación do edil”. Ademais, incidiu en que “non se pode pechar este asunto falando dun simple erro do exconcelleiro, porque non é un simple erro destinar cartos públicos a contratar a unha empresa coa que tés un claro vínculo, e a través dun expediente no que interviron máis persoas e que está cheo de irregularidades”. En consecuencia, afirmou, CA levará ao Pleno da próxima semana unha interpelación, “para que o goberno aclare, xa non só o proceder de Pichel, senón a tramitación dun expediente que está cheo de sombras”.

Así, a concelleira cuestionou que Raxoi siga referíndose “á urxencia de buscar unha localización alternativa para os departamentos de Medio Rural e Parques e Xardíns, cando a Xunta xa anunciara a demolición da estación de autobuses en xaneiro de 2021, con oito meses de antelación ao inicio do derrubo”. Para a concelleira, “o equipo de Bugallo debe aclarar por que non se iniciou a procura dunha solución ata o propio mes de setembro, ata 12 días antes do prazo máximo fixado pola Xunta para que eses servizos municipais abandonaran a vella estación”.

Para CA, tamén urxe unha explicación ao feito de que se visitara a nave de Desproi antes de facer o informe de necesidades no que se definiron as características que debía ter o inmoble a alugar para Medio Rural e Parques e Xardíns; o cal, incidiu Rozas, “equivale a solicitarlle o curriculum a unha persoa que opta a un posto, para despois elaborar as bases dunha oposición acaídas para ese curriculum”.

Por último, a voceira urxiu a Raxoi a explicar “como vai actuar a partir de agora, se lle vai seguir pagando un alugueiro de 5.000 euros mensuais á empresa Desproi e cando vai procurar unha solución para as dependencias municipais de Medio Rural e Parques e Xardíns”.