‘O Corno’ e ‘Matria’, arrasan como grandes vencedoras dos Premios Mestre Mateo

As longametraxes O Corno e Matria erixíronse como grandes vencedoras nos Premios Mestre Mateo entregados onte no transcurso dunha gala celebrada no Coliseum da Coruña, que marca o gran momento do audiovisual galego. Ambas películas, sumadas á serie Rapa, partían como favoritas acaparando un total de 42 categorías.

O filme de Jaione Camborda, O corno, foi a obra máis premiada da noite ao facerse con sete galardóns: Mellor dirección de arte (Melania Freire), Mellor maquillaxe e perruquería (Bárbara Brouke, Lorena Clavo e Silvia Neira); Mellor son (Sérgio Silva e David Machado); Mellor vestiario (Uxía Vaello) e Mellor longametraxe. Ademais, a directora alzouse cos premios a Mellor dirección e Mellor guión.

Non obstante, Matria quedou pouco por detrás. O equipo desta longametraxe recolleu un total de cinco premios: Mellor dirección de fotografía (Lucía C. Pan) e dirección de produción (Nati Juncal) e fixo pleno nas categorías de interpretación nas que era finalista, con recoñecementos para María Vázquez como Mellor interpretación feminina protagonista; Susana Sampedro como Mellor interpretación feminina de reparto e Santi Prego como Mellor interpretación masculina de reparto.

María Vázquez: "Es un orgullo que apuesten por "Matria" en versión original"

A serie Rapa foi votada polas académicas e académicos como Mellor serie de TV e tamén gañou os premios a Mellor montaxe (Gaspar Broullón, Julia Juanatey, Lucía Iglesias) e Mellor música orixinal (Xavi Font). En canto á ficción seriada, A arte de ser mal pai da produtora Miraveo obtivo o Premio á Mellor serie web.

A entrega de premios foi presentada por Lidia Veiga e Miguel Canalejo, que estiveron acompañados no escenario por Fillas de Cassandra, encargadas de poñer música ao evento coa colaboración de Mondra e os peliqueiros de Laza.

Tamar Novas por segundo ano consecutivo

O actor compostelán Tamar Novas subiu por segundo ano consecutivo para recoller o premio a Mellor interpretación masculina protagonista polo seu papel en Salta. Tamén estivo na mesma tesitura a actriz coruñesa Lucía Veiga, quen nesta ocasión foi recoñecida como Mellor comunicadora grazas ao seu traballo en “Malicia Noticias”.

Tamar Novas, el niño que jugaba en Plaza de Vigo, mucho más que actor

O listado de profesionais galardoados durante estes premios complétase cos nomes de Alba Prol, Raúl García e Jairo Iglesias na categoría de Mellor Realización polo seu traballo en O Gran Camiño. Grandes Rutas a Pé do Mundo.

Saliéntase a gran presenza feminina que houbo nestes premios, con profesionais galardoadas en case todas as categorías, exceptuando a de Mellor son e Mellor música orixinal.

Unha mirada cara o pasado

O sentimento de nostalxia foi un dos grandes protagonistas no espectáculo dirixido por Noemí Rodríguez, que comezou cun dos eslógans máis lembrados do Xabarín Club: “Hai alguén aí? Si?, Non?, Si?”.

Ademais, Xosé Ramón Gayoso tamén tivo o seu emotivo momento ao entregarlle o Premio de Honra Fernando Rey a Eva Veiga. Desta forma coroaron a gala dos Mestre Mateo: 39 anos despois reuniron aos dous presentadores que formaron parte da súa primeira emisión a Televisión de Galicia o 25 de xullo de 1985.

Outros galardóns

Os espazos en branco impúxose na categoría de Mellor documental. Mentres que, pola súa banda, Cos pes na terra acadou o premio a Mellor programa.O videoclip de C. Tangana para o R.C Celta de Vigo con Oliveira dos cen anos venceu dentro da súa categoría e Chama a miña neta foi premiado como Mellor anuncio publicitario.