O número de envases recollidos nas seis máquinas RECICLOS instaladas en diferentes puntos da USC dende comezos de ano logrou superar a barreira das 8.000 latas (681 en total) e botellas (7.396). Os datos evidencian o compromiso da comunidade universitaria coa práctica da reciclaxe a través do Sistema de Devolución e Recompensa (SDR) de Ecoembes, unha experiencia pioneira nos campus universitarios galegos. “Estamos moi satisfeitos cos resultados obtidos ao longo dos últimos meses porque amosan o compromiso da comunidade universitaria coa sustentabilidade. O programa RECICLOS contribúe a transmitir valores como o respecto polo medio ambiente a través dun xesto tan sinxelo como é o da reciclaxe”, explica o vicerreitor de Transformación Dixital e Innovación, Gumersindo Feijoo Costa.
