Volven as pelotas amarelas aos comercios e cafeterías de Baio con descontos e pinchos

Case a totalidade dos establementos comerciais e hostaleiros de Baio e de A Piroga participan nunha nova edición de Baio ten a pelota, os días 10, 11 e 12 de maio, coa que o Concello de Zas pretende dinamizar o comercio local.

Os establecementos comerciais ofrecerán importantes descontos e os bares e restaurantes tapas a un prezo de 2,50 €, que se servirán en trece locais. As propostas inclúen pementos recheos, tapas especiais, cazola de ovos con gulas, codillo, polo, raxo, pinchos morunos, así como algúns pratos doces.

Na fin de semana, as rúas estarán cheas de animación. Ao longo da estrada principal haberá postos de artesanía. Tamén haberá inchables e obradoiros infantís na Praza Jorge Mira Pérez e moita música, da que se encargarán Os Enxebres de Cabana, os membros da Asociación Cultural Adro, Os Petadores de Zas e as charangas O Rumbo de Sardiñeiro e Os Celtas.