Cáritas chama á solidariedade nestas festas de Nadal a beneficio de 150 familias da Estrada

Importantes mostras de solidariedade seguen a encher Cáritas Parroquial da Estrada xa que, despois das bolsas de carne achegadas por SBC, a Policía Local entregou caixas con xoguetes, alimentos infantís e outros produtos. Estas aportacións veñen a sumarse á colaboración continuada ao longo de todo o ano de Mercadona e a Fábrica de Mobles María Martínez, así como ás puntuais de outros establecementos e máis á Operación Quilo, xa en marcha.

Na actualidade, hai máis de 150 familias que reciben regularmente axuda de Cáritas. A meirande parte delas son do propio municipio, pero hai tamén algunha de concellos veciños (Forcarei e Vila de Cruces), así como outras de orixe marroquí, procedentes de Sudamérica ou do leste de Europa, todas residentes na capital de Tabeirós-Terra de Montes.

Por todo iso, a organización, en boca da súa directora, Mercedes Brea, quere agradecer a implicación dos organismos e persoas particulares. Así, e como todos os anos, ao longo do mes de decembro Cáritas Parroquial A Estrada (Diocesana de Santiago de Compostela) pon en marcha a Operación Quilo, co obxectivo de recadar alimentos non perecedoiros cos que atender en 2024 os requerimentos das persoas que acoden regularmente á institución en busca de apoio. Dado que “as entregas diarias de Mercadona cobren sobradamente unha parte das necesidades, recoméndase centrar as axudas en produtos como conservas, azucre, cacao, aceite e alimentos infantís; así mesmo, e en atención ao gasto enerxético que representa a cocción dos legumes, agradécese que este tipo de víveres se entreguen na súa versión xa precociñada en latas ou frascos”, apuntan as mesmas fontes.

220.000 españoles recibieron ayudas de Cáritas para el pago de la vivienda o de los suministros

Pola súa banda, a resposta dos establecementos de alimentación estradenses “é, en xeral, moi positiva, posto que colaboran habitualmente con Cáritas, colocando caixas vermellas debidamente identificadas para que os clientes que acoden a eles poidan depositar os seus donativos. Sos os seguintes: supermercados Alcampo, Familia, Froiz e Gadis; tendas de alimentación Artesa, Chedas, La Santiaguesa, Villa Brasil e Taberna de Ouzande”, traslada Brea.

Cáritas tamén agradece publicamente estas mostras de solidariedade, así como as campañas que se levan a cabo en diversos centros educativos e nalgunhas parroquias do rural estradense, pero igualmente as que poñen en marcha instalacións como a piscina climatizada ou o club de pádel. De todos os xeitos, quen prefira contribuír cun donativo económico pode depositalo no peto colocado a tal efecto na igrexa parroquial ou no local de Cáritas (rúa San Paio, nº 22). O teléfono de contacto para resolver cualquera dúbida ou aportar suxerencias é o 617 865 255.

A entidade ten en marcha unha serie de programas para os que conta coa asistencia de persoas voluntarias que altruistamente dedican unha parte do seu tempo a realizar funcións moi variadas (a maiores do labor que desenvolven na ordenación e distribución de roupa e alimentos). Así, na actualidade funciona de maneira regular un programa de apoio escolar (Xeralteca) no que participan case 20 rapaces, maioritariamente marroquíes e venezolanos, e imparten clases de español.