José Luis Pérez Añón deixa a Alcaldía de Laxe por motivos de saúde

O alcalde de Laxe, José Luís Pérez Añón, do PP, anunciou que deixa a Alcaldía e o seu cargo de concelleiro por motivos específicos de saúde e consello médico. Nun escrito presentado este mércores, 21 de febreiro, Pérez Añón deu a coñecer a súa decisión, un paso que define como moi difícil polo “valor incalculable” que ten o traballo diario e as “inquietudes profesionais” que xorden á fronte do Concello. Con todo, trátase dunha medida tomada tras unha profunda reflexión e que será “a correcta tanto para o meu benestar como para o do Concello de Laxe”, indica. Pérez Añón será substituído no cargo polo tenente de alcalde Francisco Charlín Oróns.

Laxe aprobou unha dedicación exclusiva de 32.000 euros para o edil Eulogio Constantino

Pérez Añón foi elixido nas dúas últimas eleccións municipais para presidir a Alcaldía, o que lle permitiu, tal e como asegura no comunicado, “aportar o meu modesto esforzo para favorecer a convivencia e o desenvolvemento deste concello”. Aproveitou a ocasión, ademais, para agradecer á veciñanza pola “confianza” depositada no seu traballo nestes últimos anos.

Cinco anos como alcalde

O rexedor comezou o seu primeiro mandato no ano 2019, cunha ampla maioría absoluta que reeditou nos pasados comicios electorais, confirmando a confianza da veciñanza no seu proxecto.

Sinala que foi “un pracer e orgullo” representar a Laxe e agradece o traballo e o mérito de cada un dos compañeiros e compañeiras de goberno, así como ao resto de integrantes da súa candidatura, “que se mantiveron en todo momento ao meu lado, sempre coa mellor das disposicións para cooperar e traballar no proxecto político que entre todos levamos a cabo”, sinala. Estendeu os agradecementos a “todos os traballadores municipais” polo seu esforzo e empeño, así como pola súa capacidade “para traballar en equipo”.

Durante estes case 5 anos como alcalde, segundo indicou, “centreime en mellorar o día a día da nosa veciñanza a través de servizos públicos de calidade e infraestruturas que melloraran o día a día das persoas”.

Pérez Añón finaliza así a súa etapa á fronte do Concello de Laxe e afirma que deixa o cargo para poder “dedicarlle máis tempo á familia e a todos os meus seres queridos no día a día”.

O PP agradece o seu compromiso

Os Concellos de Laxe e Vimianzo presentan alegacións ao Plan de Xestión da Paisaxe Protexida dos Penedos

A dirección do Partido Popular na provincia da Coruña encabezada polo seu presidente, Diego Calvo, destacou o traballo e o compromiso mostrado por José Luis Pérez Añón durante os seus anos como militante e alcalde do Partido Popular, e asegurou que co seu labor conseguiu que “Laxe sexa hoxe un lugar mellor que cando tomou posesión do seu cargo no ano 2019”.

Calvo non quixo pasar a oportunidade de poñer en valor a figura dunha persoa “empeñada desde hai moitos anos en mellorar a calidade de vida dos veciños de Laxe”, e de quen destacou o seu sentido do deber público tanto como no seu labor como alcalde como no seu día a día como profesional da medicina.

Para Calvo, a chegada de Pérez Añón á Alcaldía de Laxe en 2019 tras conseguir unha maioría absoluta, que revalidaría nas municipais do 2024, e despois de quedarse ás portas no 2015 sendo a forza máis votada, supuxo un “antes e un despois” para un municipio que, a partir de entón, gañou peso na comarca, converténdose nun dos concellos de referencia en todos os ámbitos.

Os veciños de Serantes, en Laxe, dispoñen xa dun local social máis eficiente e confortable

“Perdemos un alcalde moi querido entre os veciños de Laxe, unha persoa que traballou ao servizo da xente durante toda a súa vida e alguén que foi un exemplo de como facer as cousas con responsabilidade, con boa xestión e sempre poñendo por diante os intereses dos demais antes que os seus”, afirmou Calvo.

Finalmente, mostrouse “seguro” de que, a pesar de a marcha de Pérez Añón, a quen lle desexou que “goce da vida como non o puido facer ata o de agora e que empece a pensar máis en si mesmo que nos demais tras moitos anos ao servizo público”, Laxe queda "en boas mans do ata o de agora tenente alcalde Francisco Charlín Oróns".