Aprendendo a preservar a paisaxe na Costa da Morte

Os concellos de Costa da Morte están a ser escenario formativo para un grupo de mozas e mozos que participan no curso de monitorado ambiental que organiza a Fundación Eduardo Pondal, de Ponteceso.

Esta semana, durante a súa estadía en Camelle (Camariñas), recibiron a visita do director do Instituto de Estudos do Territorio (IET), Enrique de Salvador, quen lembrou que o Convenio Europeo da Paisaxe recolle a necesidade de “implementar medidas de sensibilización, formación e educación para comprender tanto a situación actual das contornas, como a súa evolución e influencia na sociedade”. 

Mar de Fábula e veciños de Camelle esixen que non se deixe esmorecer a casa de Man

Por iso, dende a Xunta de Galicia salientan a importancia de abordar o estudo da paisaxe desde unha perspectiva multidisciplinar que englobe tanto a realidade material e tanxible do territorio, como a súa dimensión social e histórica.

Así, o curso que se está a desenvolver na Costa da Morte aborda, entre outras cuestións, aspectos como o valor patrimonial da paisaxe; a súa importancia para garantir o benestar e a calidade de vida; a súa relevancia na formación da identidade individual e colectiva; a súa consideración como recurso económico, ou o seu papel como fonte de inspiración e soporte para a arte.

Afondar no coñecemento

Enrique de Salvador incidiu tamén na importancia de afondar no coñecemento para concienciar da importancia de garantir a preservación do patrimonio paisaxístico. Nese senso, lembrou que a Xunta puxo en marcha a Colección Paisaxe Galega, que consiste nun conxunto de publicacións monográficas elaboradas co fin de ofrecer consellos e recomendacións para avanzar na protección das diferentes formas de paisaxe existentes na nosa Comunidade, e que certo tipo de actuacións —edificacións de calquera natureza, peches, equipamentos de uso público, etc.— poidan lograr unha boa integración coa contorna onde se sitúan.

Os Concellos de Laxe e Vimianzo presentan alegacións ao Plan de Xestión da Paisaxe Protexida dos Penedos

Na actualidade esta colección conta con 15 volumes relacionados coa integración e as boas prácticas en distintos eidos como os núcleos rurais, os espazos urbanos, os miradoiros ou os emprazamentos publicitarios, e complementase tamén co visor interactivo A paisaxe de Galicia desde a bicicleta e mais co Atlas da Paisaxe dos Camiños Xacobeos.

E, segundo indicou o director do Instituto de Estudos do Territorio, nos vindeiros meses está prevista a presentación de tres novas guías de boas prácticas, que abordarán a integración das terrazas no espazo público, que se está a consensuar co sector; a guía para a execución de áreas de lecer; e un novidoso manual metodolóxico para a análise da ordenación do territorio baixo os efectos do cambio climático.