Vodas de ouro da promoción do 70 de Matemáticas da USC

A Promoción da Licenciatura en Matemáticas da USC que rematou no curso 1969-70 celebrou onte as súas vodas de ouro, tras adiarse o acto por mor da pandemia. Participaron a presidenta de Alumni USC, Eva López Barrio; a decana da Facultade de Matemáticas, Elena Vázquez Cendón; e o catedrático da Área de Análise Matemática, Gerardo Rodríguez, como representantes dos docentes deste curso. Ademais, participaron os tres organizadores da promoción, en representación dos máis de 20 compañeiros e compañeiras que presenciaron o encontro: o catedrático de Xeometría e Topoloxía, Luis Hervella; o catedrático da Área de Álxebra, José Luis Freire Nistal e o catedrático de Matemáticas do IES Rosalía de Castro, Rafael Romero López. Entre os matemáticos da promoción do 70 tamén presenciaron o acto o catedrático da Área de Álxebra, José Luis Gómez Pardo ou a catedrática de Matemáticas, Mercedes Sampayo Yáñez. Todos eles asinaron no Libro de Honra da Facultade de Matemáticas.