Áurea Domínguez faise coa alcaldía de Fisterra e Iago Toba renovou o cargo en Muxía

As dúas incógnitas que faltaban por despexar na Costa da Morte xa teñen solucións. Áurea Domínguez (Alternativa dos Veciños, 3 concelleiros) é a nova alcaldesa de Fisterra, despois de acadar o apoio dos concelleiros de PSOE (2) e BNG (1), e Iago Toba (PSOE, 5) renovou o seu cargo de alcalde en Muxía, logo de que non fructificasen as negociacións entre PP (3), IxM (2) e BNG (1).

Na vila fisterrana o suspense mantívose ata a mesma sesión plenaria, e todo apunta a que o apoio dos socialistas a Áurea Domínguez se decidiu despois de coñecer que no municipio de Bergondo o PSOE logrou o apoio de Alternativa dos Veciños. Pola súa banda, en Muxía, a decisión dos concelleiros do PP de votar á súa candidata, ao negarse o BNG a que formase parte dun goberno con IxM, permitiu que o socialista Iago Toba mantivese o bastón de mando.

En Ponteceso non houbo sorpresas de última hora e José Manuel Mato (PP, 4) foi investido como novo alcalde, en substitución do socialista Lois García Carballido (PSOE, 4), que abandona o cargo tras oito anos de mandato. A investidura do rexedor popular foi posible grazas ao acordo acadado con PG (2) e AxP (1).

No resto dos concellos, onde as urnas xa deixaron definido quenes serían os seus alcaldes e alcaldesas non houbo sorpresas. En Cee, Margarita Lamela (PSOE, 7) continuará como alcaldesa, pero esta vez avalada por unha maioría absoluta, ao igual que a súa homóloga en Vimianzo, Mónica Rodríguez (PSOE, 10), que pasou dun primeiro mandato en minoría a acadar dez dos trece concelleiros da Corporación local. O mesmo lle sucedeu en Coristanco a Juan Carlos García (PP, 10), quen viña tamén de presidir un goberno minoritario.

En Carballo, Evencio Ferrero (BNG, 13), viu tamén ampliada a súa maioría absoluta, ao igual que o seu homólogo da Laracha, José Manuel López Varela (PP, 12), e os dous volveron a recoller os bastóns de mando, ao igual que o fixeron José Muíño (PP, 7) en Cabana, Sandra Insua (PSOE, 7) en Camariñas e Manuel Muíño (BNG, 7) en Zas. Tamén renovou o seu cargo José Luis Pérez (PP, 6), en Laxe, quen foi o primeiro da Costa da Morte en ser investido alcalde para esta nova lexislatura.

En Dumbría, Raúl González (PSOE, 7) recolleu o bastón de mando que deixou José Manuel Pequeño Castro, tras 40 anos na alcaldía. O seu sucesor debuta no primeiro sillón municipal pero leva xa décadas formando parte do goberno municipal socialista dumbriés como tenente de alcalde. E en Malpica, Eduardo Parga (PP, 6), renovou o seu cargo de alcalde e reeditará o pacto de goberno co edil de AIM, Alfredo Cañizo, logo de gobernar xuntos xa nos dous últimos anos da pasada lexislatura.

En Corcubión haberá que agardar ao día 7 de xullo para que Javier Domínguez (BNG, 4) se faga coa alcaldía, en substitución do socialista Manuel Insua.