Un colexio de Ames, premiado pola mellor curta de animación en galego

A XI edición do certame de curtas de animación en galego 'Nós tamén creamos!' , xa ten gañadores. Entre eles, un colexio de Ames, máis concretamente a EEI do Milladoiro, que foi galardoado na categoría de segundo ciclo de Educación Infantil polo traballo 'Tonino. Un pingüín en Ames'.

Nesta iniciativa que promove a Xunta de Galicia coa colaboración da Corporación Radio e Televisión de Galicia (CRTVG) e de OQOeditora, presentáronse 31 filmes de 24 escolas distintas rodados pola cativada de tres a nove anos e os seus mestres.

Ademais da escola de Ames, foron premiadas na categoría de primeiro e segundo ciclo de primaria, o CEIP Plurilingüe Feliciano Barrera de Ponteareas (Pontevedra), pola curta 'O cascabel da gata', e na categoría de terceiro e cuarto ciclo de Primaria, o CEIP Padre Feijoo de Allariz (Ourense), polo filme 'Sígueme'.

Esta iniciativa, convocada cada ano, forma parte do programa de dinamización lingüística, desenvolto nas aulas de infantil e primaria no marco do Plan Proxecta+ do Goberno galego.

Ademais, e por primeira vez debido á alta calidade das propostas presentadas nas últimas edicións do certame, as bases permitían a concesión dun accésit para cada categoría establecida.

Deste xeito, reciben unha Mención Especial os seguintes centros: na primeira categoría, o CEE A Barcia de Santiago de Compostela (A Coruña) polo traballo 'Non fai falta a voz'; na segunda categoría, o CEIP A Canicouva de Vigo (Pontevedra) polo vídeo 'A princesa do Caurel', e na terceira e última categoría o CEIP Plurilingüe Virxe do Carme de Sober (Lugo) polo traballo tamén titulado 'A Princesa do Caurel'.

Poderán visualizarse todas as curtas premiadas no Portal da Lingua Galega, na aplicación Xabarín e na sección infantil da TVG.

Os centros premiados recibirán, ademais dun lote de libros de OQOeditoria, unha subscrición anual á plataforma desta editorial con acceso a libros, filmes e outros contidos dixitais en galego e mais un agasallo da CRTVG, así como un diploma acreditativo.

Por outra banda, o profesorado participante nas curtas premiadas recibirá da Consellería de Cultura, Educación, FP e Universidades unha certificación de Primeiro Premio de Innovación Educativa para cada unha das súas categorías, cunha equivalencia de 30 horas de formación permanente do profesorado para a persoa coordinadora e de 20 horas para o profesorado participante.

Dinamización lingüística nas aulas

'Nós tamén creamos!' é un programa de dinamización lingüística que busca fomentar o uso do galego nas aulas a través da creatividade e a incorporación das TIC, inclúe a dotación de libros para o centro educativo, así coma o asesoramento e a formación presencial e en liña do profesorado para que poida realizar nas aulas curtas de animación en galego coa técnica stop-motion baseadas en textos literarios.