Oroso acomete reformas nas escolas unitarias e nas de Infantil e Primaria

O Concello de Oroso acomete unha serie de melloras nas escolas de Educación Infantil e Primaria do municipio que inclúen as escolas unitarias das parroquias do rural, cun investimento de máis de 62.000 euros e que estarán listas para o inicio do novo ciclo escolar. As escolas encóntranse nas parroquias de Senra, Trasmonte e Deixebre e no lugar de Vilacide, na parroquia de Oroso. Faranse obras tamén nos CEIP que están no núcleo principal do concello: o Camiño Inglés e o de Sigüeiro.

Estas melloras de acondicionamiento están enfocadas en áreas como fontanería, electricidade, pintura ou carpintería, e acometeranse obras como instalación de tarima nas escolas de Vilacide e Trasmonte ou, a de maior envergadura, que é un tellado novo na escola de Senra, a máis deteriorada do Centro Rural Agrupado. “Con estas actuacións comezamos unha serie de proxectos para a mellora e mantemento dos centros educativos de Oroso, no marco do compromiso cunha educación pública e de calidade”, dixo o alcalde, Álex Doval.