A rotonda que dá acceso ao Parador de Muxía estará rematada antes da Semana Santa

A Deputación da Coruña prevé rematar as obras da nova rotonda da estrada provincial DP 5101 de Muxía a Touriñán pola costa antes da Semana Santa.

Técnicos do departamento de Vías e Obras da institución provincial estiveron estes días supervisando os traballos, que xa se atopan nunha avanzada fase de execución, aínda que quedan pendentes as tarefas de pavimentación, pintado e outros de remate, para os que son necesarios varios días consecutivos con boas condicións climatolóxicas.

Costas mellora o paseo de Corcubión, o acceso á praia de Muxía e avalía a senda de Cereixo

As obras, financiadas pola Deputación, supoñen un investimento de 404.295 euros e consisten na execución dunha rotonda cun diámetro de 30 metros no punto quilométrico 2+475, unha estrada anular de 8 metros de ancho e un diámetro central de 11 metros. A rotonda contará cunha luminaria de 3 brazos situada na isleta central.

Ademáis, o proxecto contempla a renovación do firme nos primeiros 2,5 quilómetros do vial cunha nova capa de mestura bituminosa en quente. A actuación “supón unha mellora da seguridade vial e da ordenación do tráfico neste punto, onde había unha intersección para dar acceso a Serantes, Cartel e O Vilariño e conectar coa estrada DP 2303 e co Parador de turismo”, subliñan dende a Deputación.