Parcela de Peleteiro: o delegado do Goberno confirmará nunha semana a Sanmartín que se pode facer

A alcaldesa de Santiago, Goretti Sanmartín, reuniuse este mércores co delegado do Goberno en Galicia, Pedro Blanco, para situar Compostela "no século XXI", segundo o propio Blanco. A parcela de Peleteiro, a estación depuradora da Silvouta, e as obras de Orbital e Orbitaliño foron algúns dos temas tratados na xuntanza entre a alcaldesa e Pedro Blanco, cuxos gabinetes de traballo permanecen en contacto para desenvolver os traballos acordados segundo explicaron ambos os dous políticos.

Goretti Sanmartín agradeceu a Pedro Blanco que estivera dispoñible "en pleno agosto" e trasladoulle diversas necesidades locais como que a Sareb (o banco malo) ceda ao Concello a parcela de Peleteiro para habilitar "vivenda de protección, un centro de día e unha gran praza pública", como reclama o goberno local e parte da veciñanza. Algo ao que o delegado do Goberno se comprometeu a dar resposta a vindeira semana, "se se pode facer e se non se pode ver as alternativas". 

As obras da Silvouta foi outro dos temas tratados na xuntanza. A estación depuradora (EDAR) está agora en licitación e o concello pídelle ao Estado que revise a partida orzamentaria disposta. Pedro Blanco reivindicou os case corenta millóns que achega o Estado, o 68% do orzamento, e comentou o feito de que a Xunta manteña unha cantidade orzamentaria fechada. O delegado do Goberno tamén definiu esta depuradora como "moi necesaria, non só para Santiago senón tamén para os concellos da contorna".

El Consorcio ejecutó ya 37 de los 281 millones acordados para esta década

O incremento da dotación orzamentaria do Consorcio, agora sustentado por fondos europeos, na maior parte, foi outro dos temas primordiais tratados nesta xuntanza. A alcaldesa Sanmartín pula por ir achegando a dotación económica desta institución, que actualmente está nos 4.783.000 euros, ás cifras previas á crise de 2012 (7.421.000 euros) por ser esta institución unha ferramenta fundamental “para a rehabilitación da cidade histórica e para a mellora da calidade de vida nela”, afirmou Sanmartín.

A alcaldesa de Santiago tamén lle trasladou a Pedro Blanco a “petición unánime dos grupos da Corporación municipal e de diferentes entidades cidadás de que exista un xulgado de violencia de xénero de Santiago”. E nesta mesma liña, tendo de acordo a toda a corporación, Sanmartín referiuse á estación de mercadorías da Sionlla, necesidade tamén corroborada polo Foro Cívico.

A estación intermodal foi outro dos temas tratados entre a rexedora e o delegado do Goberno, en concreto o seu aparcadoiro. “A nós gustaríanos que fose un aparcamento soterrado” incidía a alcaldesa “pero esa non foi a solución dada”. Agora, as 360 prazas de aparcamento móstranse insuficientes “así que é necesario un novo aparcadoiro”. Sanmartín falou de construír nunha área de 21.000 metros cadrados, o que dará lugar a unhas 900 prazas de párking en superficie. “Que se faga da maneira máis estética e de maior integración paisaxística”, recalcou. Tamén en relación á intermodal e de “maneira simbólica” a alcaldesa trasladoulle a Pedro Blanco a petición do goberno local de nomear a estación como "Daniel Castelao".

As obras do Orbital e do Orbitaliño foron outra das cuestións tratadas nesta primeira xuntanza de traballo entre a alcaldesa e o delegado do Goberno. “Está realizado o 83% pero na súa fase final fixo falta que se modifiquase o proxecto por problemas relacionados con drenaxes e balizamentos, agardamos que estea finalizada nos próximos meses”, explicaba a alcadesa de Santiago. No caso do Orbitaliño, a rexedora trasladou as alegacións do Concello e de asociacións veciñais e agarda que se lle dea “unha volta” dende o Goberno central “para incluír esas melloras e que cause o menor impacto no territorio” que sexa posible. “Unha obra necesaria que hai que desenvolver si ou si e que afecte o menos posible ao territorio e que se atendan as necesidades de saneamento e abastecemento”, dixo Sanmartín. Algo que tamén corroborou o delegado do Goberno, Pedro Blanco, que se referiu a estas obras como “proxectos vitais e estratéxicos para Santiago”, na procura de “mellorar a accesibilidade aos polígonos industriais e ao aeroporto e mellora na calidade de vida da veciñanza”.

Pedro Blanco tamén se referiu ás obras na estación de tren e ao Sistema ERTMS (Sistema Europeo de Xestión do Tráfico Ferroviario) do Eixo Atlántico e tamén a estación de tren do século XXI, novo edificio que se adaptará á realidade da estación e novos espazos públicos para o goce da cidadanía, o investimento do goberno supera os 30 millóns de euros.

A “humanización” da rotonda de Conxo foi outra das peticións da alcaldesa de Compostela, que recalcou a necesidade de “retomar ese proxecto, co que se comprometeron diferentes ministras e ministros pero que non se levou a cabo” e que, en palabras da rexedora, “fragmentou o barrio de Conxo”.