Sica Romero, Brenda Navarro e Nell Leyshon: as mulleres copan o premio San Clemente
A entrega de galardóns terá lugar no Salón de Actos do instituto de ensino secundario ás 18 horas
Este mércores ao mediodía o IES Rosalía de Castro de Santiago acolle a rolda de prensa de presentación do XXVII Premio Literario Arcebispo Juan de San Clemente, que este ano recaeu nas autoras Sica Romero -na categoría de novela en galego-, Brenda Navarro -para a categoría de castelán- e Nell Leyshon, -no apartado de lingua estranxeira. A entrega de galardóns será ás 18 horas no Salón de Actos do centro.
Sica Romero, Brenda Navarro e Nell Leyshon, gañadoras do Premio San Clemente de Novela
Sica Romero (Carnota, 1995) é historiadora da arte e traballa como bibliotecaria na Biblioteca de Galicia. Avelaíñas eléctricas -Nêspera Editora-, a novela en lingua galega gañadora do premio San Clemente 2024 é a súa ópera prima. Unha obra escrita na variedade dialectal propia da Costa da Morte que aborda “con agarimo distintos temas universais e ancestrais, como son a violencia, o amor, a amizade, a responsabilidade, a ética, a sexualidade, a discriminación, a diferenza, as drogas...".
Ceniza en la boca, editada por Sexto Piso, é a obra da mexicana Brenda Navarro (Cidade de México, 1982) que lle valeu o premio na categoría de novela en castelán. Unha historia na que Navarro narra a viaxe emocional dunha moza que intúe as razóns do suicidio do seu irmán adolescente e que ademais protagoniza a súa propia síndrome de Ulises. Navarro cultiva, ademais da novela, a poesía, o ensaio e o relato breve e foi merecedora con esta mesma obra do Premio Tigre Juan.
A terceira premiada nesta XXVII edición do galardón Juan de San Clemente é a autora británica Nell Leyshon (Glastonbury, 1962), coa obra La escuela de canto, editada tamén por Sexto Piso. A historia dunha nena na Inglaterra de 1573 que finxe ser un neno para escapar da pobreza e do analfabetismo e formar parte do coro que escoita cando se asoma a unha igrexa, algo naquela altura reservado para os mozos.
Temas
Más en Santiago
-
A Fundación Araguaney-Puente de Culturas conmemora o vindeiro martes o aniversario da Nakba Palestina
-
Sen acordo entre empresa e traballadores: a folga de Iberia continúa no aeroporto de Santiago con máis cancelacións
-
Raxoi celebra a lingua e mais a poesía de Luísa Villalta “unha figura forte, intensa, fascinante”
-
A residencia de estudantes do antigo hospital de Galeras funcionará como hotel durante o verán