O Casino abre a votación para que o público elixa a mellor novela europea
Os autores finalistas son: Juan Tallón, Anne Berest, Nicola Lagioia, a galega Berta Dávila e Chris Whitaker
O galardón fallarase o día 30 de abril logo da valoración dun xurado integrado por persoas de diversos sectores sociais
A Asociación Cultural Casino de Santiago abre este venres 12 o período de votación para que o público xeral elixa a obra gañadora do XVII Premio de Novela Casino. Así o comunicaron na mañá do martes os directivos da asociación, Ubaldo Rueda e Maribel Martín, acompañados polos representantes das entidades colaboradoras: Fuencisla Cid -El Corte Inglés-, Guadalupe Rodríguez -CSC Aurelio Aguirre-, José Antonio Seijas -Asociación Comercio Punto Compostela-, Antón Pedreira -Libraría Pedreira- e Jesús Torres -Biblioteca Pública Ánxel Casal-.
O período de votación estará aberto entre o 12 e o 25 de abril e as obras finalistas son Obra maestra de Juan Tallón, La postal de Anne Berest, La ciudad de los vivos de Nicola Lagioia, Os seres queridos da compostelá Berta Dávila e Empezamos por el final de Chris Whitaker. Todas aquelas persoas amantes da lectura que queiran participar poden facelo nas urnas que se colocarán no propio Casino, nos Centros socioculturais (CSC) de Santa Marta, Conxo, Fontiñas e Ensanche, na área de cultura de El Corte Inglés ou na Biblioteca Pública Ánxel Casal.
Un galardón que busca a promoción da lectura pero tamén son, en palabras do propio Ubaldo Rueda, “un pretexto para construír unha Europa diferente, máis empática e con maior concordia”.
Implicación doutras cidades
Segundo o directivo da asociación Casino Ubaldo Rueda, o XVII Premio de Novela Europea tamén pretende fomentar “as relacións cordiais entre pobos e cidades” e proba disto é a extensión da convocatoria de votacións a outras cidades galegas, de diversos puntos do Estado e tamén do estranxeiro, contando con capitais como Moscova e París, Santa Comba Dao, en Portugal ou a cidade principal da baixa Baviera, Landshut.
Desta maneira, tamén pode participar público lector acudindo a votar ás librarías de El Corte Inglés da Coruña, Vigo, Oviedo, Xixón, Avilés e León; ás bibliotecas públicas da Xunta en Pontevedra, Vigo, A Coruña, Ourense e Lugo; ás librarías da cadea Santos Ochoa en Logroño, Barcelona, Salamanca e Tudela e na libraría Hugendubel, en Landshut (Alemaña). E mediante a colaboración de diversos profesores e profesoras, haberá lectores que poidan enviar o seu voto dende París (Francia), Santa Comba Dao (Portugal) e o colexio Rosalía de Castro de Moscova (Rusia).
Fallo do xurado: 30 de abril
No afán pola promoción da lectura o certame celebrou debates arredor de catro das cinco obras finalistas, tan só falta por debater La postal de Anne Berest. A cita será o xoves 11 de abril, ás 18 horas, no CSC Maruxa e Coralia da cidade vella.
Canto á decisión final da obra gañadora desta décimo sétima edición, o fallo producirase o 30 de abril. A directiva Maribel Martín explicaba que unha vez finalizada a votación da sección B do xurado -o público- o 25 de abril, agardarase a chegada das votacións do estranxeiro e un xurado composto por 10 membros de diversos sectores sociais votará as obras finalistas. O resultado final será a suma dos votos das seccións A e B, que se coñecerá o 30 de abril.
- El dueño de un bar de Santiago y otras dos personas acaban en el hospital tras ingerir sin saberlo un pastel de marihuana
- Deportes Cibeira echa el cierre después de 45 años: “Con algunos clientes te saltan las lágrimas”
- Crónica social compostelana | Jubilación en Monte do Gozo
- Una mirada al pasado de Santiago en color: así era la Compostela de principios del siglo XX
- La empanada esculpida en el Pórtico de la Gloria: el manjar que los godos trajeron a Galicia
- El parricidio de Brión: la muerte a hachazos del Dr. Antonio Pensado estremeció a la sociedad compostelana
- Confirmada la Panorama en Santiago: Raxoi hace oficial el lugar de la actuación pese a las advertencias de Apatrigal
- Los futuros médicos celebran su graduación por todo lo alto en el Multiusos Fontes do Sar