Corenta rapaces amesáns sumáronse á ‘Finde na neve’ na estación de Leitariegos

A concellería de Xuventude de Ames organizou esta fin de semana a actividade Finde na neve, unha viaxe á estación invernal de Leitariegos, situada na comarca do Val de Laciana, en León, na que 40 mozos e mozas amesáns gozaron de dúas xornadas de esquí e natureza. A excursión incluíu o desprazamento en autobús, aloxamento e pensión completa e o acceso ás pistas e ao material de esquí, así como clases impartidas por un equipo de monitores. Na saída participaron persoas de entre 15 e 28 anos.

O grupo saíu de Ames ao redor das 16.00 horas, e chegou ao Val de Laciana cara ao final do día. Tras cear e recoller o material de esquí, os participantes na citada excursión tiveron a oportunidade de realizar unha saída pola vila.

Tras unha noite de descanso, as actividades deron comezo ás 08.00 horas do sábado. Os mozos e mozas gozaron de dúas horas de clases de esquí, e posteriormente puideron realizar a actividade por libre. Pola tarde, os excursionistas coñeceron Villablino, o núcleo principal da comarca, cualificada como Reserva da Biosfera dende o ano 2003. Alí realizaron unha xincana xunto aos seus monitores.

Xa na xornada do domingo, día 12, a rapazada volveu participar nunha nova sesión formativa de esquí, así como de máis tempo libre nas pistas de Leitariegos, antes de entregar o material e subir ao autobús para poñer fin á viaxe de tres días. O grupo regresou a Ames ao redor das 20.00 horas.