A casa de cultura de Bertamiráns conta cun novo punto de lectura

A casa da cultura da localidade de Bertamiráns, no concello coruñés de Ames, vén de incorporar novo mobiliario ao seu hall, que dende hai unhas semanas conta cunha zona de descanso e un punto de lectura para facer máis acolledora a espera dos veciños. Segundo explican desde o Concello amiense, o programa de fomento da lectura das bibliotecas foi o que fixo que incorporasen un novo punto de lectura ao hall da casa da cultura de Bertamiráns. Deste xeito, na instalación municipal colocouse un estante con todo tipo de libros. Ademais, na sala de lactancia está dispoñible un carro con coleccións infantís. Por outra banda, na entrada instaláronse dúas mesas de diferentes dimensións e cadeiras para facilitar un espazo de traballo e de reunión a todas as persoas que o desexen, precisan as fontes. Así mesmo, colocáronse oito pufs. O obxectivo deste investimento, segundo os responsables municipais, é humanizar e facer máis acolledora a espera dos veciños e veciñas, así como achegar a lectura a todos os recunchos do concello.