Catro grupos punteiros galegos actuarán no Millarock

Todo está listo no Milladoiro para acoller a duodécima edición do festival Millarock, que se desenvolverá o vindeiro venres 30 de xuño no aparcadoiro da Travesía do Porto (en fronte da escola infantil), a partir das 21.00 horas. O evento, organizado polo departamento de Cultura de Ames coa colaboración da Deputación da Coruña e a Xunta de Galicia, é xa unha das citas consolidadas do concello, e naceu co obxectivo de promover o rock galego e de impulsar grupos emerxentes da contorna, combinándoos coas actuacións doutras bandas xa consolidadas. Nesta ocasión participarán os grupos A banda da loba, Eladio y los seres queridos, Fillas de Cassandra e Las ninyas del Corro. A entrada será libre e de balde.

Un ano máis, O Milladoiro convértese en punto de encontro para os amantes do rock coa chegada do Millarock, que este ano alcanza a súa edición número doce. O evento continúa apostando pola música en galego, con ampla presenza feminina e combinando bandas emerxentes con outras consolidadas. Nesta edición, o festival renova o seu formato incorporando algunhas novidades como o cambio de localización ao aparcadoiro da Travesía do Porto, fronte a escola infantil e tamén fai unha forte aposta por incorporar outros estilos.