Travesías inclusivas no veleiro ‘Laion’

Un ano máis, e xa van vinte e un, o veleiro Laion de Cogami está a surcar a ría de Camariñas para brindar a experiencia da navegación a vela a persoas con discapacidade. Unha oportunidade que lles brinda o Proxecto Gavea (Galicia Vela Adaptada), que naceu en 2002 tras ser incautado o veleiro ao narcotráfico para ser cedido en garda e custodia á Asociación de Persoas con Discapacidade da Bisbarra de Muros (Adibismur), que forma parte de Cogami.

Dende entón, esta embarcación, fomenta a participación das persoas con discapacidade en actividades náutico deportivas ao estar dotada de adaptacións que permiten embarcar a persoas con mobilidade reducida. Para poder levar a cabo esta edición, o proxecto conta co apoio de Turismo de Galicia.

Con base no porto de Muxía, o Laion, sempre que o tempo o permita, ten programadas saídas ata mañá venres, con quendas que se distribuirán en horario de 11.00 a 14.00 e de 16.00 a 19.00 horas. En cada unha destas travesías participan, acompañadas dun monitor ou monitora, cinco persoas usuarias e socias de distintas entidades membro ou centros de Cogami. En total, durante esta edición navegarán 75 persoas que se achegarán ata Camariñas dende diferentes localidades de Galicia como Santiago, A Coruña, Muros, Silleda, Arzúa, Val do Dubra e Ourense.

O primeiro grupo en participar foi de persoas usuarias do Programa Integral de Actuacións para a Promoción da Autonomía Persoal e a Inclusión Social das Persoas con Discapacidade que Cogami desenvolve nas instalacións do Cegadi en Compostela. O pasado venres foi o turno de persoas usuarias da entidade Adisbismur da bisbarra de Muros, e o sábado embarcou un grupo do centro de recursos que Cogami ten en Medelo (Silleda), e persoas asociadas da entidade Alcer Coruña. O martes, día 12, foi a asociación Amarai de Arzúa e Terra de Melide quen saíu a navegar pola mañá, mentres que o día 13 durante a mañá gozaron a desta experiencia membros de Acem Compostela e á tarde un grupo do programa do Cegadi. O xoves 14 embarcarán usuarios de Avante, de Val do Dubra, e de Ourense Aixiña. O veleiro rematará as saídas deste ano coa asociación Íntegro (Cabana de Bergantiños) que navegará mañá día 15.

O Laion, de 13 metros de eslora, conta con adaptacións para facer practicable a navegación, como un guindastre que permite embarcar ás persoas con mobilidade reducida dende o pantalán ata uns backets instalados na bañeira do barco. O control conta cun winche eléctrico que se activa a través dun pulsador electrónico que facilita o seu goberno.

A tripulación do Laion está formada por tres persoas voluntarias que ceden desinteresadamente o seu tempo para facer posible este programa.