‘Trolebús’ literario nas rúas de Carballo

As rúas de Carballo xa se poden recorrer nun trolebús literario, un vehículo imaxinario que transporta a lugares vinculados a escritores e escritoras locais e ás súas obras.

O pasado venres o Concello despregou o Mapa Literario de Carballo, un novo recurso cultural co que se pretende dar a coñecer aos autores e autoras locais, a literatura inspirada no municipio e os recunchos dos que parte esa inspiración, ao tempo que promoven unha nova ruta turística e seguen apostando pola mobilidade sostible.

O mapa inclúe dúas liñas. A primeira delas percorrerona o venres un grupo de veciños e veciñas, e cada roteiro contará con guías moi especiais, xa que serán varios dos autores que forman parte do percorrido. Quenes decidan subirse a este trolebús literario, en cada unha das once paradas da Liña 1 atoparán un panel co esquema da ruta, o fragmento ao que fai alusión esa parada, o nome do autor ou autora e un código QR que enlaza coa páxina web do Mapa Literario de Carballo. Nos vindeiros días procederase tamén á sinalización da Liña 2.

O Mapa Literario de Carballo, ademais dun recurso turístico, cultural e mesmo deportivo, tamén é un importante recurso educativo. De feito, desde a Concellaría de Arquivos, Bibliotecas e Normalización Lingüística, que preside Ángeles Pacoret, promotora da iniciativa, xa se remitiu un convite a todos os centros educativos, aos que se lles ofrece a posibilidade de solicitar visitas guiadas para os escolares.

A Liña 1 ten como protagonistas das súas paradas a Eduardo Pondal e o seu poema Queixumes dos pinos; Xaime Díaz Alonso, autor de Carballo. Guía ilustrada de arquitectura; Cándido Alfonso González Tirados, e Mal ollo!, comedia de ambiente mariñeiro; Ramón Vilar Landeira, con Cigarros no asfalto; Rosalía Fernández Rial, con A Cabaña; Xan M. Fraga Rodríguez, con Trolebús; Alberto Ferreiro con Plus Ultura. Transición ao futuro; Xurxo Borrazás, con Costa norte/ZFK; Manuel Rivas, con As voces baixas; Ignacio Silva, con Chovía como nunca; e Xosé A. Andrade Figueiras, con Reválida de sexto.

Pola súa banda a Liña 2 estará protagonizada por Xan M. Fraga con Crónicas de Carballo; Xurxo Chapela, con Lémbrome; O Xestal, con A rateira; Alfredo Brañas, con Lembranza; Henrique Mariño, con Atar os cordóns; Xan Fernández Carrera coa Guía de Carballo; Farruco Graña, con O bosque de Nadgor; Xesús San Luís Romero, con O Fidalgo; Fernando Cabeza Quiles, con Unha de polbo, por favor; Ignacio Silva, con Galicia; e Mercedes Queixas Zas, con Lingua de area.

Esta iniciativa vén a complementar o labor que veñen facendo ao prol da cultura e da promoción dos escritores carballeses as bibliotecas municipais de Carballo.