Os contos de Paula Carballeira e a literatura de José Ángel Mañas animan unha fin de semana cultural en Cee

Cee vivirá unha fin de semana marcada polas citas culturais, que traerán á vila da Xunqueira á contacontos Paula Carballeira e ao novelista José Ángel Mañas.

A primeira cita é este sábado, día 7 ás 20.45 horas, na casa da cultura. Alí, a recentemente galardoada co Premio Nacional de Literatura Dramática, Paula Carballeira abrirá a décima edición do programa educativo-cultural O Mes da Fundación Fernando Blanco coa sesión de contos Mulleres que viven soas. A entrada é de balde.

E o domingo, ás 12.00 horas na sala de conferencias da casa da cultura, o escritor José Ángel Mañas presentará a súa novela Berenguela, coa que cerra a triloxía sobre a Reconquista, poñendo como protagonista á muller do rei leonés Alfonso IX. Acompañarán ao autor a alcaldesa de Cee, Margarita Lamela; a concelleira de Cultura, María Luisa Rodríguez; e Julia Ares, da asociación Ponteceso Cultura Permanente.

O autor mantivo tamén este venres un encontro co alumnado de primeiro de Bacharelato do IES Agra de Raíces, de Cee, para falar da súa novela.