Francisco Charlín: “O meu obxectivo é ser útil, en todo momento, aos veciños de Laxe”

O Concello de Laxe xa ten novo alcalde. Francisco Charlín Oróns (PP) recibiu o bastón de mando de mans do seu antecesor, José Luis Pérez, quen reunciou o día 21 de febreiro ao cargo por motivos de saúde.

O novo rexedor foi investido este venres nun pleno extraordinario e comprometeuse a continuar desenvolvendo iniciativas que beneficien a todas as persoas de Laxe e que contribúan “ao avance e progreso do noso municipio”. O seu obxectivo, engadiu, “ é ser, en todo momento, útil para a nosa veciñanza. Os nosos veciños e veciñas serán sempre a prioridade e as súas preocupacións e necesidades o que guíen as actuacións e accións que levemos a cabo”.

Francisco Charlín, percebeiro de profesión, xa viña exercendo como alcalde en funcións desde a renuncia de José Luis Pérez, ao que xa substituíra noutras ocasións cando o rexedor saínte estivo de baixa, polo que é plenamente coñecedor do proxecto municipal do PP de Laxe, que desde o ano 2019 goberna con maioría absoluta, unha confianza que renovou o propio Pérez nas últimas eleccións municipais de 2023.

Charlín confirmou que se dedicará en exclusiva á Alcaldía e o seu soldo será aprobado na vindeira sesión plenaria da Corporación local. Cómpre lembrar que Pérez non percibía salario, xa que está xubilado.

José Luis Pérez Añón deixa a Alcaldía de Laxe por motivos de saúde

Na sesión plenaria deste venres tamén tomou posesión Begoña Gegúndez Allo, a nova concelleira do Partido Popular, que ocupará o sillón vacante tras a marcha do anterior rexedor. Asumirá ademais as funcións de concelleira delegada de Deportes e Pesca, áreas que, ata agora, estaban a cargo de Charlín Oróns.

O novo alcalde confirmou tamén, despois de ser investido, como queda o organigrama do novo goberno municipal de Laxe. Ademais das áreas xa referidas que asumirá a nova edil Begoña Gegúndez, Raquel Lema Allo exercerá como concelleira delegada de Comercio, Hostalería, Turismo e Cultura; Sandra Mouzo Pose exercerá de edil delegada de Servizos Sociais, Emprego e Igualdade; Daniel Mata Martínez será o concelleiro de Xuventude, Festas e Medio Ambiente; e, finalmente, Eulogio Constantino Castiñeira asume a concellería delegada de Persoal, Obras, Servizos e Praias.

Apoio de Alfonso Villares

Ao acto de toma de posesión do novo alcalde asistiron, ademais dos concelleiros dos grupos da oposición, o conselleiro do Mar en funcións, Alfonso Villares, representantes do PP na comarca de Bergantiños, veciños e veciñas de Laxe.