Eleccións municipais 2023: os candidatos de Santiago de Compostela

Xosé A. Sánchez Bugallo, candidato por el PSdeG

O actual alcalde de Santiago, Xosé Sánchez Bugallo, preséntase o 28M á reelección. Nesta lexislatura, ademais de na Alcaldía, ten competencias en Promoción Económica, Emprego, Mercados e Comercio e é portavoz da Xunta de Goberno. A súa andanza na política local comezou en 1987 como concelleiro socialista á fronte de Deportes, Relacións Veciñais, Tráfico, Persoal e Facenda. Entre 1991 e 1999 foi tamén deputado provincial e, en 1998 accedeu por primeira vez á alcaldía compostelá, logo da renuncia de Xerardo Estevez. Goberno a cidade durante tres lexislaturas consecutivas e entre 2012 e 2016 foi deputado no Parlamento de Galicia. En 2019 volveu á política municipal e recuperou a alcaldía para o grupo socialista.

Unha tarde, un candidato: “Máis que pasear a min gústame andar, pero teño pouco tempo”

Borja Verea Fraiz, candidato do Partido Popular

O candidato dos populares á alcaldía compostelá, Borja Verea é Licenciado en Dereito polo Universidade de Deusto e doutor nesta materia pola USC. Na súa traxectoria profesional foi funcionario de Habilitación Nacional das subescalas de Intervención-Tesouraría e Secretaría-Intervención no Corpo Superior da Administración Xeral da Xunta de Galica. Entre 2015 e 2020 exerceu como secretario xeral técnico da Consellaría de Economía da Xunta, da que xa formara parte entre 2011 e 2015. Anteriormente desempeñou o cargo de subdirector xeral de Réxime Xurídico Local da Consellaría de Presidencia (2009-2011) e secretario-interventor no Concello do Saviñao (2007-2009).

Unha tarde, un candidato: “Reunímonos os amigos cando temos un momento e tocamos”

Goretti Sanmartín Rey, candidata polo BNG

A candidata nacionalista preséntase por segunda vez á alcaldía de Compostela, logo da súa primeira candidatura nas eleccións de 2019. Profesora universitaria e doutora en Filoloxía Galego-Portuguesa, foi directora do Servizo de Normalización Lingüística da Universidade. Dentro do BNG, Goretti Sanmartín foi responsable local da formación e vicepresidenta da Deputación da Coruña. Na actualidade, forma parte da Executiva Nacional do BNG.

Unha tarde, unha candidata: "Fixen teatro na escola e practico cos contacontos"

María Rozas Pérez, candidata de Compostela Aberta

Licenciada en Ciencias Políticas pola USC, con mestrado en Extratexias, Axentes e Políticas de Cooperación ao Desenvolvemento por HEGOA. Dedicouse á consultoría de xestión económica e patrimonial para as Administracións Públicas e foi voluntaria en divesas ONGD's, até a súa chegada a Concellaría de Economía e Facenda de Santiago, entre 2015 e 2019. Unha vez rematada a lexislatura de goberno da súa formación, María Rozas volveu de novo ao Concello en 2020, exerzendo a portavocía da súa formación.

Unha tarde, unha candidata: "Crieime nunha Compostela na que aínda se podía xogar na rúa"

Luís Emilio Batallán González, candidato de Compromiso por Galicia

Coñecido como cantautor polo seu traballo Aí vén o maio, Luís Emilio Batallán é tamén médico, compositor e músico. Encabeza a candidatura de Compromiso por Galicia. Nunca ostentou cargo municipal máis lidera esta candidatura “pola súa “vocación de servizo público”.

Beatriz Cristina Estévez, candidata do Partido Galego

Avogada agora dedicada á docencia, Beatriz Cristina Estévez lidera a candidatura destoutro partido de nova formación, o Partido Galego, PG. É profesora titular de Lexislación do Centro Superior de Hostalaría de Galicia e non ostentou até agora cargo político.

Fernando Mayo, candidato de Vox

Doutor en Medicina e Diplomado en Enfermaría, o candidato de Vox á alcaldía de Santiago e especialista en Prevención de Riscos Laborais, Seguridade no Traballo e Medicina do Traballo. O candidato de Vox á alcaldía de Compostela defínese como “firme defensor da integración da saúde pública e privada” e nesta dirección creou en 2010 unha empresa de servizos de medicina de familia, laboral e enfermaría do traballo.

Ángel Jiménez Lavilla, candidato de Por e Para Santiago

O candidato deste partido veciñal, que tamén é presidente da formación, é empresario autónomo que traballou por moito tempo como xefe de obra e nunca ocupou un cargo político ao igual que o resto de membros desta formación de nova constitución. Na actualidade, Ángel Jiménez Lavilla é o presidente da Asociación de Veciños de Vista Alegre.