A DXT inicia este luns unha campaña especial de control de alcol e drogas en Galicia

A Dirección Xeral de Tráfico (DXT) inicia este luns unha nova campaña especial de control sobre a taxa de alcol e a presenza de drogas en condutores que se estenderá até o domingo, 17 de decembro.

Debido ás datas de Nadal, a campaña terá especial incidencia nas zonas de lecer, moitas delas en ámbito urbano, polo que promoverá a implicación dos Concellos e dos seus policías locais.

O obxectivo, destacou a Delegación do Goberno, é concienciar sobre os riscos do consumo de alcol e drogas ao volante, que "está presente nun terzo dos accidentes mortais como factor concorrente ou causante".

Estes datos despréndense da 'Memoria de investigacións toxicolóxicas en vítimas mortais de accidentes de tráfico do ano 2022', que revela que dos 854 condutores falecidos en España en accidentes de tráfico e sometidos a autopsia e análise toxicolóxica, 443 deron positivo en alcol, drogas ou psicofármacos.

A última Comisión Autonómica de Seguridade Viaria avanzou que no que vai de ano a Garda Civil de Tráfico efectuou en Galicia 700.000 probas de alcol e 8.000 probas de consumo de drogas.

Delas, 11.300 probas de alcol deron resultado positivo, así como 277 probas de drogas. Ademais, a Garda Civil abriu dilixencias penais a 1.400 condutores por ter índices de alcol e drogas en sangue constitutivos de delito.

Campaña 2022

A Delegación do Goberno destacou que na mesma campaña realizada entre o día 5 e o 11 de decembro de 2022 en Galicia controláronse 35.029 condutores e resultaron sancionados 812, dos cales 535 foron positivos en alcol e 277, en drogas.

Por provincias, onde máis positivos se detectaron foi na Coruña, con 374; seguido de Pontevedra, con 196; Lugo, con 158; e Ourense, con 84.