A debate o valor terapéutico das augas mineromedicinais

Baixo o título A saúde é o que importa, a Cátedra de Hidroloxía Médica USC-Balnearios de Galicia promove un ciclo destinado a difundir entre a sociedade o valor terapéutico das augas mineromedicinais. O xoves pasado celebrouse a segunda sesión deste ano, no compostelán Café Casino, que estivo moderada polo codirector da cátedra, o doutor José Martín Carreira. Os expertos participantes mantiveron un coloquio posterior co público asistente. O doutor Hugo Vázquez, xefe do Servizo de Dermatoloxía do CHUS, centrouse nas indicacións da cura balnearia para tratar diversas enfermidades da pel. O doutor Alejandro Rodríguez, facultativo especialista do Servizo de Anxioloxía e Cirurxía Vascular do CHUS, afondou nos beneficios da balneoterapia en relación ás doenzas vasculares crónicas. A maiores, o doutor Jesús Figueroa, xefe do Servizo de Rehabilitación do CHUS, referiuse aos efectos terapéuticos das augas mineromedicinais na recuperación das secuelas de afeccións neurolóxicas crónicas como o párkinson.