Goretti Sanmartín, primeira alcaldesa de Santiago "co agradecemento ás que abriron camiño e ás que están por vir"

Cunha puntualidade rigorosa, ás 10 da mañá deste sábado principiaba o pleno extraordinario de constitución da nova corporación municipal que levará as rendas do Concello de Santiago os próximos catro anos. A sesión deu comezo coa formación da mesa de idade e o desfile de concelleiros e concelleiras electos nas eleccións municipais do pasado 28 de maio para o xuramento ou promesa do cargo. Coa súa inseparable gorra, o edil nacionalista Xesús Domínguez protagonizaba un momento divertido ao ter que sacala para recibir a medalla de concelleiro por parte de Sindo Ginarte, para volver poñela despois.

Logo deste punto da orde do día do pleno, o secretario da mesa daba paso á votación para elixir entre os dous candidatos á Alcaldía: o popular Borja Verea e a nacionalista Goretti Sanmartín que resultou gañadora ao obter a maioría de votos dos membros da corporación, 14 fronte aos 11 do candidato do PP.

Tras recibir o bastón de mando e prometer o seu cargo de alcaldesa "co agradecemento ás mulleres que abriron camiño e ás que virán", Goretti Sanmartín, vestida de morado nunha clara declaración de intencións, avanzou no seu discurso as liñas mestras dun goberno "que non deixe a ninguén detrás".

FOTOGALERÍA | Pleno extraordinario de constitución da nova corporación municipal do Concello de Santiago

Ver galería

Nas súas primeiras declaracións como alcaldesa, Sanmartín quixo facer un "discurso de amor, esperanza e confianza no futuro da cidade", destacando a importancia da política como ferramenta para "mellorar a vida das persoas" coa "esperanza nun futuro feminista e sustentable, de solidariedade e benestar". A nacionalista manifestou o seu amor profundo por Santiago: "síntome moi afortunada de vivir en Sar e atravesar a Porta Faxeira de Mazarelos, que é a única que se mantén en pé". Sanmartín fixo referencia ao inmenso patrimonio da cidade usando o exemplo dos taboleiros de xogo medievais, repartidos pola zona vella e rescatados polo colectivo A Rula, para facer un paralelismo co que agarda conseguir de Santiago: "son magníficos exemplos da cidade que queremos, con espazos de recreo públicos para que a veciñanza se encontre na rúa, que a cidade deixe de ser un parque temático e sexa para quen a habita", afirmou anunciando que promoverá un Pacto polo Turismo.

Referíndose ao Obradoiro, onde se sitúa a casa consistorial, a alcaldesa continuou asegurando que "a praza nos dá a oportunidade de ver os distintos piares da cidade", que pasou a enunciar: o turismo, as institucións públicas, o Consello da Cultura, a USC e a Catedral. "Con eles queremos proxectar Santiago neste século XXI, que tanto nos está a custar", avogando polo diálogo con todos estes axentes, "fluído e fructífero coa Xunta e o resto de entidades".

A respecto da Universidade, Goretti expresou a súa intención de defender a condición e a importancia da comunidade universitaria como "unha marca do concello de Santiago hai que atender".

Na súa toma de posesión, a alcaldesa quixo tamén ter un recordo para A Falcona, o cárcere situado detrás do Concello e polo que pasaron no franquismo composteláns represaliados coma Manuel Ríos, Díaz Valiño ou quen fora alcalde de Santiago, Ánxel Casal. O seu retrato, avanzou Goretti, estará no despacho da Alcaldía como xa fixera no da Vicepresidencia da Deputación da Coruña.

Quixo ademais Sanmartín ter unhas palabras para quen denominou a súa "Alba de Gloria particular" enunciando, entre outros, a Ánxel Casal, Díaz Pardo, Vidal Bolaño, Begoña Caamaño ou Exeria, "que forman parte da nosa memoria". Tamén a gran poeta galega, Rosalía de Castro, da que anunciou a creación da plataforma Compostela, cidade de Rosalía.

Poñer Santiago á vangarda do feminismo e a igualdade, eliminar as barreiras arquitectónicas para facer desta unha cidade máis accesible, facilitar o acceso á vivenda e facer fronte á emerxencia climática e a defensa da identidade e a lingua foron outros dos campos de batalla anunciados por Sanmartín. Tamén o de atraer industria porque "en ningún lugar está escrito que Santiago non poida ser unha cidade industrial", dixo Goretti, "porque que é preciso "atraer empresas vinculadas ao coñecemento para xerar riqueza na nosa terra".

A nova alcaldesa dedicou tamén o seu discurso ao rural compostelán co compromiso de traballar coas parroquias nun rural vivo porque "este concello é tan seu coma dos veciños da Senra". Farao a través dun "goberno de portas abertas, activando canles de participación, con transparencia" cara a unha cidadanía que "será a protagonista os próximos catro anos".

Ademais dos apoios para ser investida, tanto de Compostela Aberta como do PSdeG, Sanmartín pechou o seu discurso agradecendo "a miña nai Marisa de Flores e a madriña Marucha, dúas mulleres ás que lle debo ser quen son".