Afonso Eanes: participar para manter activa a asociación cultural na Baña e Negreira

“Economicamente temos recursos, pero buscamos máis participación”. Esta frase, da súa presidenta, Olalla Liñares, resume o sentir que vive unha das entidades pioneiras na comarca, a Asociación Cultural Afonso Eanes do Cotón, que vía a luz o día 22 de decembro de 1976 para Negreira e A Baña en torno a “unha idea de cultura”. O día 7 de febreiro de 2014 rexurdía das súas cinzas despois de varios anos de práctica inactividade, e agora cren preciso involucrar á veciñanza para darlle continuidade.

Así o destacaba Liñares, quen eleva a “uns sesenta” os socios actuais. Chegou a ter máis na súa época inicial, pero este fondo humano parece suficiente para seguir, sempre que haxa vontade. “Para ser realistas, non estamos no mellor momento, e o principal motivo é que non hai renovación xeracional, porque moitos dos que reactivamos a cultura nin residimos na comarca actualmente”.

Deste xeito, e con menos participación, actívase un dos binomios aos que máis rabia lle ten calquera directivo dunha entidade similar: “Temos menos forza, e facemos menos cousas, e ao facer menos cousas, temos menos forza”, unha carioca que leva o rabo na boca á que aluden na súa directiva. “Pero o que está claro é que queremos que continúe, polo que simboliza, e manter actos como a xornada do rural, que tan contenta está a deixar á xente”, suliñan as mesmas fontes. Ao fío, non desbotan recuperar novas actividades, como os populares magostos, e buscar a implicación da veciñanza.

O outro gran cabalo de batalla da AC Afonso Eanes (completan a directiva Rubén Mayo como vicepresidente, Xián Liñares, secretario, e Arantxa Pazo, tesoureira) é a necesidade dun local, non tanto para se reunir, “senón que petamos na porta do Concello de Negreira solicitando un pequeno espazo para almacenaxe” dos fondos e lembranzas, como o que xa tiveron na casa da cultura ata hai poucos anos, pero que lle foi retirado ca explicación de que era necesario para un obradoiro de emprego. “Dinnos que a cousa está complicada, polo que volveremos falar co rexedor, Ángel Leis, e, de non haber sorte, miraremos para o outro municipio, o da Baña”, explican.