Trinta empresas á busca de talento novo na comarca de Bergantiños

A décimo terceira Feira de Emprego organizada pola Cámara da Coruña xuntou este martes en Carballo a uns 120 mozos e mozas, menores de trinta anos, dispostos a facerse cos cincuenta postos de traballo que ofertaron as trinta empresas participantes. Froito da elevada participación e do interese por satisfacer as expectivas, tanto da mocidade como das compañías presentes, ao longo da xornada realizáronse preto de seiscentas entrevistas que poderían dar como froito nos vindeiros días á incorporación ao mercado laboral de medio cento de aspirantes.

As necesidades das empresas da comarca de Bergantiños e a súa contorna son moi variadas. Entre os postos que pretenden cubrir destacan os de persoal do sector do medio ambiente, para tendas de alimentación e retail, axentes comerciais, enxeñeiros industriais, informáticos, e especialistas en telecomunicacións e electricidade. Asemade, tamén precisan de perfís técnicos de FP, como frigoristas, carpinteiros, albaneis, soldadores, técnicos de instalacións eléctricas e electromecánicas, así como de xestión administrativa, e persoal para hostalería, loxística, delineación e deseño industrial.

Díaz defiende la gestión de Trabajo con la tasa de paro juvenil más baja en 16 años

E se numerosa é a oferta, non menos o é a demanda dun primeiro emprego por parte da xente nova. Así, a vicepresidenta da Cámara, Luz Pardo, asegurou en Carballo que “na actualidade, no Programa de Garantía Xuvenil temos inscritos, en expectativa de emprego, a 9.368 mozos, pertencentes aos 39 municipios que conforman a demarcación cameral”.

Un dato que, non obstante, vén descendendo nestes últimos anos. “A través do programa PICE, levamos impartido máis de 500 accións formativas e preto de 4.000 mozos formáronse connosco”, engadiu.

A Cámara da Coruña conta ademais cun Viveiro de Empresas no polígono de Bértoa (Carballo) desde hai máis de 15 anos, “que axudou a despegar a un importante número de iniciativas emprendedoras, achegándolles ese apoio tan necesario nas primeiras fases de consolidación e crecemento”, subliñou Luz Pardo.

Ata á Feira do Emprego tamén se achegou o alcalde de Carballo, Evencio Ferrero, quen destacou o potencial do Fórum “como centro acolledor de novas iniciativas e actividades formativas”, e alentou os mozos a seguir formándose porque “a formación é a base, o camiño a seguir para atopar un emprego que realmente faga felices ás persoas”. As trinta empresas que están aquí representadas, engadiu, “ofrécenvos unha estupenda oportunidade para que poidades atopar o voso espazo laboral”.

No transcurso da xornada, e en paralelo ás entrevistas, os mozos puideron tamén asistir a seminarios deseñados para axudarlles a mellorar a súa empregabilidade, dotándolles de ferramentas e consellos para participar en procesos de selección.