D-due, unha empresa de moda de Rianxo con tenda en Xapón

A conselleira de Economía, Industria e Innovación, María Jesús Lorenzana, visitou as instalacións da empresa téxtil D-due, de Rianxo, unha das 240 compañías galegas que se teñen beneficiado das axudas da Xunta para favorecer a súa expansión internacional, especialmente cara países como Xapón, onde dispón dunha tenda propia.

Lorenzana puxo en valor o esforzo que o tecido empresarial está facendo por diversificar mercados e comercializar os seus produtos e servizos noutros países. Apuntou ademais que un dos obxectivos da Xunta é impulsar a internacionalización da economía galega e que pemes, autónomos e establecementos comerciais teñan acceso a novas canles e destinos de comercialización. Ao respecto, informou de que, ata o vindeiro 23 de novembro, está aberta a convocatoria das liñas de axuda Galicia Exporta Empresas e o programa Galicia Exporta Organismos Intermedios, que suman máis de 3M€, con axudas máximas que roldan os 95.000 e os 400.000€, respectivamente.