O PSdeG pide reformar o Estatuto, pero apoiará a tramitación da Lei do Litoral

O secretario xeral do PSdeG, Valentín González Formoso, confirmou onte que os socialistas galegos manteñen a intención de apoiar a tramitación parlamentaria da Lei do Litoral que impulsa a Xunta, se ben recoñeceu que preferiría unha reforma do Estatuto para que Galicia puidera asumir as competencias en materia de Costas, como defende o delegado do Goberno, José Ramón Gómez Besteiro. Non obstante, asegurou non sentirse desautorizado polo seu compañeiro de filas, co que, dixo, fala “todos os días”.

Segundo González Formoso, o máis importante neste momento é “darlle seguridade xurídica ao sector mar-industria”, do que dependen 40.000 familias en Galicia e que, salientou, é probablemente o sector “máis estratéxico do país”. Esa será a “prioridade” do PSdeG na tramitación parlamentaria da lei, fase en que, asegurou, estarán vixilantes para impedir “pelotazos urbanísticos ou barras libres” na costa galega.

La Xunta aprueba este jueves el proyecto de ley del litoral contra la que alegó el Gobierno

Con todo, González Formoso recoñeceu que, tal e como apuntou esta semana Gómez Besteiro, o desexable sería que Galicia reformara o seu Estatuto para poder asumir as competencias en materia de Costas.

Así, cuestionou que o PP leve anos “bloqueando” calquera posibilidade de avanzar neste sentido e asegurou que o PSdeG estaría disposto a “acoutar” unha reforma estatutaria a ese único aspecto.

González Formoso instou a Rueda a solicitar a convocatoria da comisión mixta de transferencias para poder chegar a un acordo na cesión de competencias a Galicia. “Ofrézome como interlocutor”, sinalou o líder dos socialistas galegos.

Pero neste asunto, o presidente da Xunta, Alfonso Rueda, non ve máis que dous camiños entre os que debe decidir o PSdeG. “Trátase de defender o noso litoral ou de recoller velas se efectivamente houbo un toque de atención” dende Madrid, sinalou o líder do PPdeG.

La Xunta defiende la constitucionalidad de su ley del litoral que el Gobierno de Sánchez definió como "casi una declaración de independencia"

Na súa comparecencia ante os medios posterior ao Consello da Xunta, Rueda pediulles aos socialistas galegos que sexan valentes e apoien a Lei do Litoral. Lembrou que a norma “conta co aval” do Consello Consultivo, que certificou que podía ser aprobada “sen necesidade de reformar o Estatuto”. O demais, dixo, son “liortas internas” e “contradicións”.

Da cuestión tamén falou onte a voceira nacional do BNG. En declaracións recollidas por EFE, Ana Pontón, asegurou que a Lei do Litoral “vai ser papel mollado”, porque Galicia non ten competencias para poder ordear o litoral, algo do que responsabilizou o Goberno de Rueda.

Pontón amosou as súas sospeitas de que, con esta lei, o PPdeG queira consolidar a presenza de Ence na ría de Pontevedra.