Unha feminista á fronte da Alcaldía

Completamente vestida de morado, a cor da loita feminista, tomaba posesión na mañá deste sábado a primeira alcaldesa da cidade, a nacionalista Goretti Sanmartín, que recibiu 14 votos, fronte aos once do outro candidato á Alcaldía, o popular Borja Verea. Sanmartín, que vai gobernar Santiago en minoría, con oito concelleiros, e integrando no goberno os dous edís de Compostela Aberta (CA), quixo deixar patente desde o inicio do seu discurso “a enorme emoción e responsabilidade coa que tomo posesión”.

FOTOGALERÍA | Pleno extraordinario de constitución da nova corporación municipal do Concello de Santiago

Ver galería

No Salón de Plenos do Pazo de Raxoi desenvolveuse, dende as dez da mañá, o ritual para a toma de posesión das concelleiras e concelleiros que configuran xa a nova Corporación municipal. O exconcelleiro Sindo Guinarte foi o presidente da mesa de idade, xunto á máis nova das edís, Nerea Barcia, do Partido Popular (PP). Un a un e por orde alfabética foron recollendo a súa acta os membros da corporación até a votación daqueles que se postularon como candidatos, Goretti Sanmartín e Borja Verea. Co resultado a favor, a nacionalista prometeu a toma de posesión como alcaldesa amosando o seu “agradecemento ás mulleres que abriron camiño e polas que virán”.

Discurso completo de Goretti Sanmartín, nova alcaldesa de Santiago

O discurso de Goretti Sanmartín, centrado no compostelanismo, incluíu temas primordias dos contidos nos programas electorais de BNG e CA, como “poñer as persoas no centro” das políticas, unha axeitada xestión do turismo, a defensa da lingua, do feminismo e da igualdade, a accesibilidade, a sustentabilidade e o rural, entre outras.

“Quero expresar a miña intensa emoción e a gran responsabilidade coa que tomo posesión”, así comezaba Sanmartín a asumir o cargo de alcaldesa, incidindo en que “a política só ten xustificación para construír un mundo mellor”. A intencionalidade da súa intervención, segundo ela misma afirmaba, “era a de facer un discurso de amor, de confianza e de esperanza”. “Amor”, explicaba, “a Compostela, confianza na súa xente e experanza de traballar nun futuro de vangarda”.

A cidade coas persoas no centro e un turismo sostible foron ideas programáticas, tanto de BNG coma de CA, e nesta liña falou a alcaldesa eloxiando o traballo do Colectivo a Rula que catalogou “case 200 alquerques, taboleiros de xogos de orixe medieval e barroca tallados en pedra, situados en espazos públicos pero nas beiras, para non molestar a quen camiñase”, comentou Sanmartín. “Son magníficos exemplos da Compostela que queremos, coas rúas e as prazas como lugares para a veciñanza”, “e por que digo isto?”, continuaba, “porque desexo que este concello deixe de ser só destino turístico” e nesta liña Goretti avanzou a sinatura dun Pacto polo Turismo Consciente. Logo disto, Sanmartín fixo un percorrido discursivo pola Praza do Obradoiro (Hostal, Universidade, Pazo de Raxoi, Catedral...). “Este será, non teño dúbida, o goberno do diálogo”, sentenciaba para engadir tamén que a súa Alcaldía será transparente, honesta e dunha “honradez absoluta”.

Goretti Sanmartín quixo tamén recuperar a memoria, con referencias á II República e á Falcona, o cárcere franquista, e en especial o alcade Santiago, Ánxel Casal, vencedor en 1936 “con oito concelleiros do Partido Galeguista nunha corporación de 32 membros”, lembraba a alcaldesa, e fusilado o 19 de agosto do mesmo ano. “O seu retrato presidiu o meu despacho na Vicepresidencia da Deputación da Coruña e presidirá agora o da Alcaldía de Santiago porque é lección da que aprender”.

Sanmartín pediu permiso para facer de hoxe a súa “particular Alba de Gloria”, lembrado persoas ilustres da historia compostelá, como o Mestre Mateo, Maruxa e Coralia, Xohana Torres ou Camilo Díaz Valiño e Rosalía de Castro, da que reivindicou a importancia, na vida da poeta de Compostela, así como de ser a “escritora galega máis universal e pioneira do feminismo”. Foi aí cando a alcaldesa falou de botar a andar o Proxecto Compostela cidade de Rosalía, como unha plataforma “da nosa cultura cara ao exterior”.

“Queremos un concello na vangarda do feminismo e da igualdade, de todas as igualdades”, remarcou Sanmartín, para referirse á igualdade social, con políticas que “atendan as persoas que máis o necesitan, a poboación avellentada en soidade, as que chegan á nosa cidade e non atopan abrigo”. O coidado das persoas, na procura de garantir os dereitos básicos de “vivenda e traballo”, a cidade accesible e a emerxencia climática foron outros eixos do discurso, “engánase quen pense que desde os concellos non podemos facer fronte ao cambio climático”, dixo.

Sanmartín tamén se referiu ao emprego e á industria, “en ningún lugar está escrito que Santiago non pode ser unha cidade industrial”, a recuperar a améndoa porque “queremos que nas prazas xoguen nenos e nenas” e por iso se redactará un Pacto pola Cidade Histórica, porque “o que é bo para quen vive aquí é bo para quen nos visita”. E o rural foi tamén protagonista do discurso, cun compromiso en firme por parte da nova alcaldesa, “Santiago é un rural grande que quere servizos e este goberno municipal traballará arreo para que a débeda histórica desapareza e poidan vivir como merecen”.

O peche do discurso de investidura de Goretti Sanmartín centrouse, como xa anunciaba na campaña, no feminismo e na igualdade. “É unha inmensa honra ser a primeira alcaldesa da capital galega” para engadir “é de obriga recoñecer o labor das que nos precederon”. E por segunda vez pediu permiso á audiencia para “lembrar hoxe dúas mulleres que non están xa connosco mais que me acompañarán sempre, tamén neste novo camiño, a miña nai, Maruxa de Flores, e a miña madriña, Tinucha”.

Sanmartín tamén tivo un oco para agradecer ás persoas que confiaron nela, ás concelleiras e concelleiros de BNG e PSdeG e, especialmente, “ás representantes de Compostela Aberta” e a todos os membros da corporación municipal “e do persoal do Concello”.

Os outros protagonistas

María Rozas, Mercedes Rosón, Borja Verea e Ana Pontón, portavoz nacional do BNG foron outros dos protagonistas da xornada. O outro candidato á Alcaldía, Borja Verea mostrouse decidido e contundente cos medios, “o noso interese son os intereses xerais de Santiago e para iso comezamos hoxe unha alternativa de futuro, imos contruír un goberno de progreso porque estamos convencidos de que imos estar á fronte da cidade máis pronto que tarde”. Verea valorou o novo goberno como “soberbio e inútil” e o discurso da nova alcaldesa como “sectario”. “Un goberno instalado na soberbia, porque son seis máis dous; no sectarismo, cun discurso máis centrado no pasado que no futuro e, ademais, inútil, porque o din os propios números”, sentenciou Verea.

A aliada e próxima tenenta de alcaldesa, María Rozas, falou dun “día histórico para Santiago, dende o resultado das eleccións dixemos que facilitaríamos que Compostela teña a súa primeira alcaldesa e hoxe tomou posesión Goretti Sanmartín”. “Entendemos que a mensaxe das urnas era que a cidadanía quería un goberno de esquerdas e actuamos en consecuencia. A líder do PSdeG, Mercedes Rosón, explicou que “o Partido Socialista sempre vai facer unha oposición construtiva” e, nesta liña tamén aclarou que “sempre remaremos na mesma dirección, o presente e o futuro de Compostela, a min o único que me preocupa é a veciñanza, que tanto queremos e respectamos”.

Inés Rey renueva la Alcaldía de A Coruña y espera más acuerdos tras desaparecer Marea

Ana Pontón, ademais de cualificar o día como “moi emocionante para toda a cidade e en especial para as mulleres” desexou que “a emoción que hoxe se sente aquí por ter unha alcaldesa, oxalá sexa a que vai ter Galiza de poder ter unha presidenta”.