Comba Campoi e Miguel Penas, as grandes novidades na renovada candidatura de Compostela Aberta

“Este equipo é un fiel reflexo dunha CA plural, aberta, feminista, con experiencia de Goberno e con ideas claras de futuro para mellorar a vida da xente”. Así definiu María Rozas, candidata de Compostela Aberta á alcaldía, a lista coa que se presenta ás próximas eleccións municipais. Na relación dos dez primeiros postos, que conforman seis mulleres e catro homes, destacan as ausencias, por decisión propia, dos actuais concelleiros Jorge Duarte e Branca Novoneyra. Ademais, Xan Duro escala ata o segundo posto; Comba Campoi García, doutora en Ciencias da Comunicación, activista e profesora no ensino secundario na familia profesional de Servizos Socioculturais, parte no número 3 e Miguel Penas, actual coordinador do grupo municipal, sitúase no cuarto lugar da candidatura de CA. A continuación está Graciela Carro, unha autónoma que rexenta a súa propia axencia de seguros; no sexto posto figura o músico Javier García e no sétimo a profesora de Educación infantil Marisa Álvarez. Este primeiro tramo da lista complétano o educador social Jaime Belo, a avogada no ámbito da mobilidade Luisa Pasín e Marta Lois, voceira municipal ata o pasado mes de outubro, que cae o décimo posto para centrarse no novo proxecto político liderado por Yolanda Díaz, Sumar. Nunha lista moi renovada, nos postos denominados de saída so repite o actual edil Xan Duro.

“O primeiro tramo da nosa candidatura é a mostra do enorme capital humano que tén Compostela Aberta. É un orgullo encabezar unha lista que vai sobrada de enerxía, de ilusión, e de responsabilidade”, indicou Rozas durante a presentación. E engadiu: “É o froito do proceso de escoita e diálogo que iniciei tras a miña designación como candidata en outubro, tanto con xente activa en Compostela Aberta como con persoas máis alleas á nosa dinámica interna, ás que quero agradecerlles as súas achegas, as súas propostas e mesmo a súa dispoñibilidade para sumarse a esta candidatura”.

Así mesmo, Rozas incidiu na valía das persoas que a acompañan: “Unha vez máis queda demostrado que CA conta cun enorme capital humano, do que non poden presumir outras organizacións, e que nos permite presentar unha candidatura con caras novas, con persoas que chegan cargadas de forza e de propostas innovadoras e de futuro para Santiago”. Sinalou tamén que no primeiro tramo da lista “figuran persoas que son recoñecidas polo seu activismo máis alá do político, porque fixeron e fan parte do movemento sindical e feminista, ou do asociacionismo cultural, ecoloxista ou veciñal”. “É un especial orgullo –destacou– porque esta é unha lista feminista, non só porque este primeiro tramo estea constituído por máis mulleres que homes, senón porque todas e cada unha das dez persoas que o integran teñen o convencemento de que o futuro é feminista, como escoitabamos hai poucos días polas rúas de Compostela”.

Ademais, a candidata de CA á alcaldía puxo o acento en que a súa lista “está tamén moi ben representado o termo municipal de Santiago, con candidatos e candidatas dos barrios, do Ensanche, ou do rural...”. “Algo que tamén procuramos porque cremos que nada mellor que estar apegados ao territorio para diagnosticar problemas e procurar solucións”, engadiu.

Do mesmo xeito, explicou, “procurouse unha lista plural no que tén que ver cos perfís profesionais, mesmo coas idades dos e das candidatas, porque queremos unha lista diversa como diversa é Compostela”.

María Rozas rematou a súa intervención agradecendo a dispoñibilidade de todas as persoas que forman parte deste primeiro tramo da candidatura, e recoñecendo tamén o traballo feito desde o Concello polos concelleiros e concelleiras que formaron parte do grupo municipal de Compostela Aberta e que non repiten nos postos de saída. “Agora é preciso combinar experiencia e renovación para asegurar o futuro dunha organización, CA, que está plenamente consolidada en Santiago e que vai seguir sendo referente das políticas municipais verdadeiramente transformadoras”, sinalou.