Conservación do patrimonio histórico: o Concello intervén na recuperación de 21 lavadoiros de Santiago
Comezaron os labores de roza e limpeza, que se complementarán cunha segunda fase para a recuperación e posta en valor destes elementos etnográficos
No de Picaños xa se poden ver os resultados dos traballos de mantemento previos á limpeza da cantería, impermeabilización e reposición da lousa que lle falta
Redacción
O Concello de Santiago vén de desenvolver un plan de roza e limpeza de lavadoiros, que se complementará cunha segunda fase para súa recuperación e posta en valor. Estes traballos incluíron o baleirado e limpeza das pías, a roza da contorna da parcela, retirada de lixo, depósitos, lama e de herbas de raíz, cunha intervención inicial en 21 lavadoiros que vén de concluír.
Entre eles, actuouse no lavadoiro de Picaños, de planta octogonal e cun diámetro de dous metros. Trátase dun elemento etnográfico singular con oito zonas de lavado independentes en cada unha das caras do octógono, así como unha canle que recolle a auga dunha pía situada ao lado das escaleiras de granito que chegan da parte alta. O espazo está delimitado por un muro de granito que serve de banco corrido ou de pousadoiro para o cesto da roupa. Na actualidade, xa se pode ver o resultado dos labores de limpeza e roza de vexetación neste lavadoiro de Picaños, necesarios para a segunda fase en que se vai proceder á limpeza en seco da cantería, ao saneado das lousas, impermeabilización e colocación dunha lousa que falta.
Impermeabilización e recuperación das canles de auga
Nesa segunda fase realizaranse actuacións de impermeabilización do vaso dos lavadoiros onde se detectou esta necesidade, xunto con labores de saneado e rexuntado de paramentos e a colocación de chaves para o peche do desaugue onde se precisen, para conseguir que se reactive a circulación da auga.
Nalgúns casos tamén se mellorará a pavimentación da contorna do lavadoiro, coa reposición de adoquinado e de lousas de pedra, así como o adecentamento das cubertas que posúen.
En concreto, nesa intervención actuarase nos lavadoiros do Romaño, do Avío, Vite, Guadalupe, Salgueiriños de Arriba, Salgueiriños, Picaños e Casal do Castiñeiriño, por precisaren melloras para a súa conservación, logo de se avaliaren as patoloxías detectadas e de que se prescriban as actuacións de intervención para cada un deles.
Os lavadoiros, patrimonio de Santiago
Os lavadoiros eran construcións ao aire libre deseñadas para lavar roupa a man, situadas xeralmente preto de fontes de auga como ríos. Orixinalmente, aproveitábase un lugar con abundante auga, utilizando pedras planas para fregar a roupa. Estes lavadoiros eran maioritariamente rectangulares, sen teito ao principio, pero máis tarde engadíuselles un.
Eran esenciais desde finais do século XIX ata a década de 1950, mellorando a calidade de vida ao evitar viaxes ao río e facilitar o lavado de roupa. Tamén tiñan un papel social importante, sendo puntos de encontro para as mulleres e lugares onde os mozos socializaban.
Estes lugares cumprían unha función económica, xerando empregos como o das "augadoras" que levaban auga ás casas e as "lavandeiras" que lavaban a roupa nos lavadoiros. A construción de lavadoiros públicos gratuítos mellorou as condicións laborais destas persoas.
Co tempo, a instalación de auga corrente nos fogares e a introdución de electrodomésticos, como a lavadora, reduciron a necesidade dos servizos das augadoras e lavandeiras. Aínda que algúns lavadoiros se seguen a empregar hoxe en día como substitutos en casos de fallos eléctricos, perderon a súa función social como puntos de encontro do pasado.
- Cierra un nuevo local en la 'milla de oro' de Santiago y ya se alquila por 3.500 euros al mes
- Denuncian destrozos en el suelo del Obradoiro tras la actuación de la orquesta Panorama
- Relevo en la Gerencia del área sanitaria de Santiago: Sanidade nombra a Ángel Facio Villanueva
- Sar: barrio rico, barrio pobre
- Sin fecha para la residencia de Santiago donada por Amancio Ortega: la Xunta mantiene la previsión de abrirla este mes
- Sigue la polémica por la Panorama: el Concello evaluará los daños en el Obradoiro
- Una multinacional francesa toma el control de tres parkings de Santiago: San Clemente, San Caetano y el Hórreo
- Caamaño asegura que Ángel Facio llega a Santiago para "coger el toro miura que es el CHUS