A Xunta presenta un contencioso contra o proxecto do Estado para humanizar a travesía do Milladoiro

A Xunta presentou un recurso contencioso-administrativo contra o proxecto de humanización da estrada estatal N-550 no treito coincidente coa travesía do Milladoiro (Ames), aprobado polo Ministerio de Transportes e Mobilidade Sostible sen someterse ao trámite de información pública. A conselleira de Infraestruturas e Mobilidade, Ethel Vázquez, informou da decisión ao colectivo veciñal A Xunlla de Laraño, que lle pediu a xuntanza para abordar o proxecto impulsado polo Goberno central para humanizar a travesía entre a glorieta do quilómetro 67+075 e a do 68+600, reducindo a súa capacidade ao pasar de 4 a 2 carrís.

Tildan de nula la humanización de Milladoiro por omitir el trámite de información y audiencia

Incumprimento dos trámites

A Xunta alega que se incumpriron trámites preceptivos para a aprobación do proxecto, que ten importantes afeccións ás vías autonómicas. Ademais, elaborou un estudo do impacto da intervención, que arroxa como principal consecuencia o transvasamento de tráfico da N-550 á autovía Santiago-Brión e á vía Pardiñas-As Galanas, por mor do incremento dos tempos de viaxe como consecuencia da redución de carrís.

O informe tamén pon o foco na intensidade dese transvase de tráfico na fase de construción, debido ás restricións na travesía, con cortes alternativos e circulación por zonas non pavimentadas. O estudo indica que “este transvasamento na situación final suporá unha desviación dun 24% do tráfico que circula pola travesía (uns 7.500 vehículos diarios)” e que podería ser do 50% durante a obra.

La humanización avanza en Ames con una expropiación en Milladoiro y el fin de obras Edusi en Bertamiráns

Conxestión de tráfico

“Na situación final das obras, o incremento de tráfico na vía Pardiñas-As Galanas significará un empeoramento do nivel de servizo en hora punta, achegándose á conxestión pola imposibilidade de adiantar e o elevado volume de tráfico, especialmente o pesado”, segundo a Xunta.

O incremento de tráfico na AG-56 e o corredor Pardiñas-As Galanas suporá un custo adicional de 1,6 millóns anuais para a Xunta, polos pagos xerados polo tráfico adicional.

O recurso alega que o procedemento para a aprobación do proxecto non cumpriu os trámites de información pública, audiencia á Axencia Galega de Infraestruturas e analizar outras alternativas para a actuación.

Pola súa banda, o Concello considera “vergoñento como o PP utiliza a Xunta para facer campaña electoral. Está maltratando a Ames para gañar un puñado de votos facendo oposición ao Goberno de España. Dende o primeiro momento buscou a confrontación, nunca o diálogo. Non imos permitir que maltrate á veciñanza de Ames comprometendo o investimento máis importante da súa historia”. “Os veciños e veciñas de Milladoiro que levan anos sufrindo a contaminación e con problemas de saúde parece que non son tan importantes para a Xunta coma os de outros concellos”, engade.