Costa da Morte homenaxea a Kepa Junquera no Festival de Cans

A Costa da Morte tamén foi protagonista no Festival del Cans, onde tivo lugar a estrea do videoclip Para Kepa, un proxecto de Bela Fisterra Producións que rende homenaxe ao gran músico vasco Kepa Junquera, quen estivo presente no acto.

Ata Cans viaxaron tamén Fernando Fraga e Nestor Fidalgo para poñer a música en directo; Juan Lesta, creador do videoclip; o poeta fisterrán Modesto Fraga cos seus versos; Pepe Formoso, xerente do Hotel Bela Fisterra, e a familia de Pazos de Merexo.

Formoso asegura que este videoclip "é un proxecto musical cheo de emocións e de música". Lembra que o pasado 28 de abril fixo un ano da volta ao Bela Fisterra de Kepa Junquera, o espazo onde ofreceu o seu último concerto antes de que un ictus cambiase radicalmente a súa vida.

Música, arte y mucha emoción en el regreso de Kepa Junkera a Fisterra

No seu regreso a Fisterra foron "moitos os amigos que se achegaron a velo, sentilo, e darlle todas as apertas que non lle poideramos dar durante moito tempo", subliña Formoso. Entre eles, Fernando Fraga, virtuoso do acordeón de piano, "que nos sorprendeu a todos interpretando unha peza orixinal dedicada, xunto a Nestor Fidalgo á pandeireta: Para Kepa". E ese foi o xermolo deste novo proxecto.

Á recepción do artista tamén se sumaron e fixeron a súa aportación artística en forma de escultura Guille Lourido, natural de Corcubión e afincado en Asturias; Alfonso Pato, do Festival de Cans; Xurxo Souto; Antonio Nodar; Sindo Novoa; e a familia do acordeonista Pazos de Merexo, entre outros. "Emocións e emocións que non quixemos que quedarán só nese día", afirma Formoso.

Por iso, co apoio de Juan Lesta, un dos grandes artistas audiovisuais de Galicia "puxémonos mans á obra", engade. O resultado é o videoclip estreado no Festival de Cans e que xa se pode ver nas redes sociais e na canle de YouTube de Bela Fisterra.